Конго Демократик Республикасида Эбола касаллигига чалинганлар сони ўтган йилнинг июлидан буён 2,8 минг нафарга ортди. Жаҳон Соғлиқни сақлаш ташкилоти хабарига кўра, уларнинг қарийб 1,9 минг нафари вафот этган. «ТАСС»нинг ёзишича, мамлакатда ҳар ҳафта 86 та хавфли касаллик ҳолатлари қайд этилмоқда.

Фото: Flickr

«12 август ҳолатига кўра, 2831 та касаллик ҳолатлари қайд этилган бўлиб, уларнинг 1891 таси ўлим билан якунланган. Касалланганларнинг 826 нафар тузалган», — деб таъкидлаган ЖССТ расмий вакили Кристиан Линдмаер. Унинг сўзларига кўра, бугунги кунда Конго аҳолисининг 121 минг нафари касалликка қарши эмланган.

Ўз навбатида БМТнинг Болалар фонди (YuNISEF) дунё ҳамжамияти эътиборини ушбу касалликнинг болаларда кечадиган оғир оқибатларига қаратди. YuNISEFнинг расмий вакили Марикси Меркадо Женевада бўлиб ўтган брифингда 4 август ҳолатига кўра, мамлакатда 18 ёшгача бўлган 787 нафар бола ва ўспирин Эбола касаллигига чалингани, уларнинг 527 нафари вафот этганини маълум қилган.