Тошкентда 19 июль куни консуллик масалалари бўйича Ўзбекистон—Грузия Ташқи ишлар вазирликлари ўртасидаги маслаҳатлашувларнинг биринчи раунди бўлиб ўтди, дея хабар бермоқда Ўзбекистон Ташқи ишлар вазирлиги матбуот хизмати.
Хабар беришларича, маслаҳатлашувларда иштирок этиш учун Грузия Ташқи ишлар вазирлиги Консуллик департаменти директори Георгий Табатадзе бошчилигидаги делегация Ўзбекистонга келган.
Маслаҳатлашувлар чоғида консуллик соҳасидаги икки томонлама муносабатларнинг ҳозирги ҳолати ва истиқболлари ҳамда икки мамлакат ҳуқуқ-тартибот органлари ўртасидаги ҳамкорликни кенгайтириш масалалари муҳокама қилинган.
«Миграция соҳасидаги ҳамкорлик, фуқаролик, оилавий ва жиноий ишлар бўйича ҳуқуқий ёрдам кўрсатишга алоҳида эътибор қаратилди. Электрон визаларни бериш, идентификация карточкаларини расмийлаштириш жабҳаларида, консуллик соҳасига замонавий технологияларни жорий қилиш ва Фахрий консул институтидан фойдаланиш масалалари борасида ҳам тажриба алмашилди», — дейилади хабарда.
Музокаралар якунида Консуллик маслаҳатлашувлари баённомаси имзоланди. Ҳужжат консуллик-ҳуқуқий соҳасида эришган келишувларини икки мамлакатнинг манфаатдор вазирлик ва идоралар томонидан бажарилишини тартибга солади.
Изоҳ (0)