Вазир ўринбосари ойликлар ошиши ОТМ контрактига таъсир кўрсатиши ҳақидаги масалани очиқ қолдирди

Халқаро пресс-клубнинг «Иш ҳақи, пенсиялар, стипендиялар ва нафақалар миқдорини ошириш тўғрисида»ги Президент фармони мазмун-моҳиятига бағишланган сессиясида бандлик ва меҳнат муносабатлари вазири ўринбосари Баҳодир Умрзоқов пенсия билан нафақанинг фарқи ҳақида гапирди. Бу ҳақда ЎзА хабар берди.

Унга кўра, пенсия — бу, фуқаронинг ишлаган вақти эвазига пенсия ёшига етганида ҳар ой олиб турадиган пул. Нафақа пули бир марталик бўлади ёки белгиланган тоифаларга ажратилади.

Сессияда иштирок этган Олий ва ўрта махсус таълим вазири ўринбосари Сарвархон Бузрукхонов жорий йил 1 августдан иш ҳақи, пенсиялар, стипендиялар ва нафақалар миқдорининг ошиши ОТМ тўлов-шартнома пулига таъсир кўрсатиши ҳақидаги масалани очиқ қолдирди.

Молия вазири ўринбосари Шохруҳ Шораҳмедов эса меҳнатга ҳақ тўлашнинг энг кам миқдори ва базавий ҳисоблаш ёки пенсияни ҳисоблашнинг базавий миқдори ўртасидаги фарққа ойдинлик киритди.

Меҳнатга ҳақ тўлашнинг энг кам миқдори лавозим маоши, устама, қўшимча пул, гонорарлар, қўшимча иш учун компенсация тўловлари, озиқ-овқат, йўл ва рағбатлантирувчи бошқа турдаги тўловлар, иш ҳақини ҳисоблашда қўлланиладиган чегара миқдор, қонунчилик билан белгиланган чегириб қолиш ҳамда иш ҳақи миқдорига боғлиқ бўлган бошқа тўловларни аниқлаш мақсадида меҳнат муносабатлари соҳасида қўлланилади.

Базавий ҳисобланган сумма солиқлар, йиғимлар, жарималар, давлат божлари, стипендиялар ва тақдим этиладиган давлат хизматлари учун бошқа тўловлар миқдорини аниқлаш, шунингдек, оиланинг ижтимоий қўллаб-қувватловга муҳтожлигини аниқлашда қўлланилади.

Ҳисобланган пенсия кўрсаткичи пенсия ва ижтимоий таъминот соҳасида қўлланилувчи, пенсия, устама, қўшимча тўловлар ва компенсацияларни ҳисоблаш, шунингдек, меҳнатдаги майиблик бўйича муносабатлар учун керак бўлади.

Молия вазири ўринбосари айтишича, аҳоли ойлик ошишидан қувонади. Лекин буни ҳадик билан кутиши ҳам бор гап. Мутахассислар бу ҳолни ҳисобга олади, албатта. Алоҳида соҳа мутахассисларининг ойлик маоши кўтарилиши инфляция даражасининг ошмаслигига ижобий таъсир қилади.

Тадбиркорликнинг бирдан ривожланиб кетиши ҳам инфляция даражасининг ошиб кетишига таъсир кўрсатади. Сабаби Ўзбекистон бозор иқтисодиётига ҳали тўлалигича ўта олгани йўқ. Нархни сунъий жиловлаш эса бошқа салбий муаммоларни келтириб чиқаради.