O‘zbekistonda 2019-yil 20-iyunda Bosh vazir o‘rinbosari Tanzila Norboyeva raisligida Bola huquqlari to‘g‘risidagi konvensiyaning bajarilishini tashkil etish masalalari bo‘yicha idoralararo muvofiqlashtiruvchi kengash yig‘ilishi o‘tkazildi. Bu haqda “Daryo”ga UNICEF’ning O‘zbekistondagi vakolatxonasi ma’lum qildi.
Mutaxassislar mamlakatda o‘tkazilayotgan islohotlar jarayonida bola huquqlarining ta’minlanishi masalalarini hamda Bola huquqlari to‘g‘risidagi konvensiyaning 30 yilligini nishonlash rejalarini muhokama qildi.
“BMTning Bola huquqlari to‘g‘risidagi konvensiyasi dunyoda eng ko‘p davlatlar tomonidan ratifikatsiya qilingan BMT bitimi bo‘lib, u butun jahondagi bolalarning hayotini yaxshilashda muhim ahamiyat kasb etadi”, — dedi Tanzila Norboyeva.
“Mamlakatimizda bola huquqlarini ta’minlash borasida qator chora-tadbirlar amalga oshirildi. O‘zbekiston Prezidenti Bola huquqlari kafolatlarini yanada kuchaytirishga oid qo‘shimcha chora-tadbirlar to‘g‘risida qaror qabul qildi”, — deb ta’kidladi u.
Boshqa masalalar bilan bir qatorda, kengash a’zolari ota-ona qaramog‘idan mahrum bo‘lgan bolalarning ehtiyojlarini qondirishga qaratilgan besh yillik harakat rejasini ishlab chiqish jarayonini muhokama qildi.
“Hukumat ota-ona qaramog‘isiz qolgan bolalar uchun oiladagidek muqobil sharoitlarni yaratish bo‘yicha rejalar ishlab chiqayotganligi quvonarli holatdir. Oilalarni qo‘llab-quvvatlash tizimini kuchaytirish uchun ota-ona qaramog‘idan mahrum bo‘lgan bolalarning deinstitutsializatsiyasi hamda ular uchun oila ko‘rinishidagi muqobil sharoitlarni yaratish bo‘yicha harakat rejasini ishlab chiqish lozim. Buning uchun bolalarni katta muassasalarga joylash amaliyotini o‘zgartirishga, uning o‘rniga bolalarni o‘z oilalaridan ajratishning oldini olishga qaratilgan mahalliy hamjamiyat tashabbuslariga e’tibor qartish lozim,” — dedi UNICEF’ning O‘zbekistondagi vakolatxonasi rahbari Sasha Graumann.
Izoh (0)