Россиялик продюсер Бари Алибасов тирик, аммо оғир ҳолатда

Россиялик таниқли продюсер Бари Алибасов кейинги уч кунни оғриқ қолдирувчи препаратларда ўтказади. Бу ҳақда «На-На» гуруҳининг собиқ аъзоси Владимир Левкин маълум қилди, дея хабар беради «РИА Новости».

«Шундан кейин операция ёки бошқа чоралар ҳақида гап бўлиши мумкин», — деди Левкин.

72 ёшли Алибасов Склифосовский номли институт жонлантириш бўлимига стаканларни алмаштириб, тасодифан шарбат ўрнига қувурларни тозалаш учун мўлжалланган суюқликни ичиб юборганидан сўнг тушиб қолди. Шифокорлар унга ошқозон ва нафас йўллари куйиши ташхисини қўйган.

Продюсер оғир ҳолатда, аммо мустақил нафас олмоқда. Олдинроқ ижтимоий тармоқлар ва каналларда Бари Алибасов вафот этгани ҳақида хабарлар тарқалганди.