Бундан буён токи 2021 йил 1 январга қадар кундузи чироқ ёқиб юриш шарт эмас. Ҳукумат қарорига Хушнуд Худобердиев шундай изоҳ берган.
«Сиз бемалол бугундан бошлаб чироқларингизни ўчириб юришга ҳаққингиз бор, бунинг учун ҳеч ким Сизни жаримага тортмайди. Расман шунақа бўлди.
Барча машиналар чироғини ёқмай юрса бўладими?
Йўқ, барча эмас. Қуйидаги ҳолларда машиналар 2021 йилни кутиб ўтирмасдан ҳозир ҳам чироғини ёқиб юришга мажбур:
транспорт воситалари ташкилий жамланма (колонна) сафида ҳаракатланаётганда;
йўловчиларни ташиётган автобус ва йўналишли транспорт воситаларида;
болалар гуруҳини ташкилий ташишда;
хавфли, катта ўлчамли ва оғир вазнли юкларни ташишда;
механик транспорт воситаларини шатакка олишда (шатакка олиб кетаётган транспорт воситасида);
мотоцикл ва мопедларда.
Шунингдек, автоматик ёниб турувчи кундузги сигнал чироқлари билан жиҳозланган машиналарга ҳам бу талаб сақланиб қолди (чунки уларда шундоқ ҳам ёниб юрарди).
2020 йил 1 январдан бошлаб ички бозор учун чиқадиган барча машиналарга автоматик ёнадиган кундузги чироқлар ўрнатиш мажбурий бўлади. Шунингдек, хориждан олиб кириладиган машиналарга ҳам бундай талаб қўйилади. Келгусида кундузи чироқ ёқмаганлиги учун жарималар миқдори камайтирилади», — дея тушунтириш берган Хушнуд Худойбердиев.
Хушнуд Худойбердиевга кўра, бу шубҳасиз жамоатчиликнинг ғалабаси бўлди. Халқимизда «тақиллатилган эшик бир кунмас бир кун очилади» деган нақл бор. Ҳа, ўша эшик ва ниҳоят очилди. Гарчи ёнғин хавфсизлиги ходимлари ўз тиллари билан машина ёнишига айнан кундузи чироқ ёқиб юриш сабаб бўлганлигини айтишган бўлса-да, лекин Ички ишлар вазирлиги бутун халқни ёнғинлар бундан эмаслигига ишонтиришга ҳаракат қилди, қарор лойиҳасини ишлаб чиқишдаги ўзларининг хатоларини тан олгиси келмади.
Лекин шундай бўлса-да жамоатчилик назорати камдан-кам учрайдиган ғалабаларидан бирига эришди. Бу ғалабада ижтимоий тармоқлардаги халқнинг эътирозлари, ОАВлардаги мақолалар, «Муносабат» ток-шоусидаги муҳокама ва 2-3 нафар жонкуяр депутат, умуман, жуда кўпчиликнинг ҳиссаси бор. Барча муаммоларга шундай бир ёқадан бош чиқариб бирлашилсагина бирор натижага эришса бўлади. Хуллас, ғалаба муборак!
Изоҳ (0)