ЎзА Жиззах вилояти Дўстлик тумани «Қаҳрамон» қишлоқ фуқаролар йиғини ҳудудидаги хонадонларга суюлтирилган газ вақтида етказиб берилмаётганини маълум қилди.
Андижон кўчасида яшовчи Болбуви Ҳимматова суюлтирилган газ учун охирги марта жорий йил 27 мартда 22 минг сўм тўлаб келган. Ўшандан бери ҳали газ ололмаётган кекса онахоннинг оиласи ўчоқдан фойдаланиб келмоқда.
«Икки ойдан бери газ йўқ. 21 минг сўм пул тўлаганмиз. Яқинда борсам, 92-ўриндасиз, ҳали сизга газ бера олмаймиз, дейишди. Дала ишларидан чарчаб келиб ўчоқда ўт ёқиб овқат тайёрлаймиз. Уйда ёш болалар, кексалар бор. Айниқса, рўза кунлари жуда қийналаяпмиз. Арз қилмаган идорамиз қолмади, аммо натижа йўқ», — дейди Ўзбекистон кўчаси 91-уй 2-хонадонда яшовчи Зулхумор Эшмуродова.
Хонадонларнинг кўпчилигида айнан шу аҳвол. Бунинг устига суюлтирилган газ баллонининг бир донаси 21—22 минг сўмдан тўлдирилаётганидан ҳам аҳоли норози.
«Қишлоқда жами 1 минг 200 хонадон суюлтирилган газ олади. Январь ойидан шу кунга қадар ҳаммаси бўлиб 1 минг 861 та газ баллони тарқатдим, холос. Одамларнинг норозилиги тўғри. Кўпчилик тўрт-беш ойда бир марта газ олган. Менга ойлик берилмайди, ҳар бир баллонга 21 минг сўмдан олишимни айтишган. Шундан минг сўми менга қолади. Бундан ҳамманинг хабари бор», — дейди қишлоқни суюлтирилган газ баллони билан таъминловчи Абдусаид Абдукаримов.
Maxсус жой йўқлигидан газ баллонлари Абдусаид Абдукаримовнинг ҳовлисида сақланар экан.
Фақат «Қаҳрамон» қишлоғида эмас, туманнинг суюлтирилган газдан фойдаланувчи 6 та қишлоқ фуқаролар йиғини ҳудудида ҳам таъминот яхши эмас.
Масалага янада ойдинлик киритиш мақсадида Пахтакор туманлараро газ таъминоти участкаси Дўстлик туман бўлими устаси Хайрулла Яхшилиқов билан телефон орқали боғланганилганида ойлик белгиланган 70 тонна суюлтирилган газни тўлиқ олишда қийинчилик бўлаётгани, аммо олинаётганини айтган. Лекин истеъмолчилар пулини тўлаб ҳам газ ололмаётгани сабабини аниқ изоҳлай олмаган.
Изоҳ (0)