АҚШ давлат департаменти виза олиш жараёнига ижтимоий тармоқларнинг таъсири ҳақида маълумот берди

Эндиликда Америка визасини олиш учун берилган аризалар диққат билан ўрганиб чиқилади. Хусусан, консулликлар аризачининг ижтимоий тармоқдаги саҳифаларини ҳам текширади. Янги қоида 2018 йилда таклиф этилган эди, бироқ виза анкеталари консуллик сайтларида яқинда пайдо бўлди, деб хабар қилади Forum Daily.

Анкетани тўлдиришга нима янгиликлар қўшилган?

Ижтимоий тармоқдаги контактлар, олдинги телефон рақамлар, барча электрон почта манзиллари ва сўнгги беш йилда хорижга амалга оширилган ташрифлар. Олдинлар бу каби маълумотлар юқори террорчилик даражасига эга одамлардан сўралар эди.

Қайси ижтимоий платформалар текширилади?

Facebook, Twitter, Instagram, YouTube, LinkedIn, Flickr, Google+, Reddit ҳамда Tumblr. Бундан ташқари АҚШдан ташқарида машҳур бўлган ижтимоий тармоқлардаги саҳифалар ҳам кўрсатилиши керак, масалан — «ВКонтакте» ёки «Одноклассники».

Виза олиш қоидаларига киритилган янги талаблар АҚШга туристик, таълим олиш, ишлаш ёки иммиграцион мақсадлари бўлган инсонларга тегишли. Дипломат ва расмий делегация аъзоларига янги қоидалар тааллуқли эмас.

Агарда ариза берувчи ижтимоий тармоқлардан ҳеч қачон фойдаланмаган бўлса ҳам бу ҳақда тегишли бандни белгилаши лозим.

«Ариза берувчи ҳеч қачон ижтимоий медиадан фойдаланмаган бўлса, бу унга виза берилмаслигига сабаб бўла олмайди», — дейилади АҚШ давлат департаментининг баёнотида.

Аммо ёлғон маълумот берган фуқароларга виза берилмайди.