Бугун,

  • USD 11014.01
  • RUB 191.8
  • EUR 10674.78

Ўтган йил охирларида Хитойнинг CCTV-4 — «Дўстлик» телеканали журналистлари Фарғонага келган, бу ерда маҳаллий таҳририятлар, телерадиоканаллар фаолияти билан танишиб, турли мавзуларда телекўрсатувлар тасвирга олганди. Бу ҳақда «Дарё»га Журналистлар ижодий уюшмаси Фарғона вилоят бўлими маълум қилди.

Фото: Журналистлар ижодий уюшмаси Фарғона вилоят бўлими

Фото: Журналистлар ижодий уюшмаси Фарғона вилоят бўлими

Шу кунларда дунёнинг 170 та давлатида эфирга чиқадиган CCTV-4 канали «Буюк ипак йўлидаги Марғилонга саёҳат», «Ипак жилолари», «Ҳунармандлар сулоласи», «Фарғонанинг учқур отлари» ҳамда «Конфуций Фарғонада» деб номланган ҳужжатли фильмларни намойиш этмоқда. Уларда қадимий Марғилон тарихи, буюк зотлари, ҳунармандчилик анъаналари, вилоятдаги тарихий-маданий мерос, сайёҳлик салоҳияти, ўзбек халқининг урф-одатлари ва анъаналари, табиати ва одамлари ҳақида ҳикоя қилинган.

Кўрсатувлар хитой тилида бўлса-да, инглиз тилига таржима қилиниб, субтитр (тасвир остидаги матн) билан эфирга узатилди, ижтимоий тармоқлар орқали тарқатилди.

Фото: Журналистлар ижодий уюшмаси Фарғона вилоят бўлими

Фото: Журналистлар ижодий уюшмаси Фарғона вилоят бўлими

Тарихий манбаларда қайд этилишича, бундан 21 аср муқаддам Хитой императори элчиси Фарғона водийсига келган. У ўзи билан узун оёқли қорабайир наслли учқур отлар, узум, ёнғоқ уруғи ва кўчатидан олиб кетган. Императорнинг буйруғига кўра бу кўчатлар Хитойда маҳаллийлаштирилган.

Хитойлик телеижодкорлар элчи босиб ўтган манзиллар, хусусан, Қувасой шаҳридаги «Водий тулпорлари» қорабайир от наслчилик мажмуаси ҳақида қизиқарли кўрсатув тайёрлади.

Ўзбекистон журналистлари ижодий уюшмаси Фарғона вилоят бўлими ташаббуси билан кетма-кет уч марта ўзбек ва хитой тилларида чоп этилган Конфуцийнинг «Суҳбат ва мулоҳазалар» китоби Ўзбекистон—Хитой маданий алоқаларини мустаҳкамлашга муносиб ҳисса қўшди, деб айтилади кўрсатувларнинг бирида.

Фото: Журналистлар ижодий уюшмаси Фарғона вилоят бўлими

Фото: Журналистлар ижодий уюшмаси Фарғона вилоят бўлими

— Вилоят бўлими Хитой журналистлари ассосиацияси билан бевосита ижодий алоқалар ўрнатган. Сўнгги икки йилда 31 нафар фарғоналик журналист Хитой оммавий ахборот воситаларида ўзаро тажриба алмашди. Ўз навбатида, Хитойнинг 33 нафар таниқли журналисти бўлим таклифи билан ўзбекистонлик ҳамкасблари фаолияти билан танишгани келди. Бу каби ҳамкорлик натижасида ёзилган мақолалар, тайёрланган телекўрсатувлар туфайли икки мамлакат халқлари бир-бирини янада яқинроқ билиши имконияти яратилди, — дейди бўлим раиси Муҳаммаджон Обидов.

Изоҳ
Асосий янгиликлар