Бухородаги «Подслушано в Бухаре» Telegram каналида 13 май куни эълон қилинган видеолавҳада Галаосиёдаги автомобилларга газ қуйиш шохобчасида бензобак портлаб, ёнғин содир бўлгани ҳақида изоҳ ёзилганди. Бухоро вилояти Фавқулодда вазиятлар бошқармаси ходими Ўктам Бобомуродовнинг «Дарё»га маълум қилишича, ёқилғи қуйиш шохобчасида портлаш содир бўлгани ҳақидаги гап ҳақиқатга тўғри келмайди.
Маълум бўлишича, Бухоро туманидаги Галаосиё шаҳри, «Мустақиллик» маҳалласи йўли ёқасида жойлашган 19-сонли ёқилғи қуйиш шохобчасига қарашли автомобилларнинг яроқсиз эски балонлари, шунингдек, резина чиқиндилар тўпланадиган усти ёпиқ айвонида эътиборсизлик оқибатида ёнғин содир бўлган.
Маҳалла участка нозири Шукур Ҳусеновнинг билдиришича, мазкур ёқилғи қуйиш шохобчаси ҳамда унинг яқинида жойлашган «Арсенал» тўйхонаси тадбиркор аёл Мунира Содиқовага тегишли.
13 май куни кечга яқин рўй берган ёнғин ҳақидаги шошилинч хабар орқали ўт ўчирувчилар жуда тез етиб келган. 15–16 дақиқа ичида ёнғин бартараф этилган. Ёнғин чоғида жуда кўп одам тўпланган.
Одамлар ижтимоий тармоқларда ваҳима уйғотувчи хабар орқали тарқалгандек ёқилғи қуйиш шохобчасидаги баклар эмас, балки яроқсиз балон ва резина чиқиндилар ёниб кетганини кўрган, гувоҳ бўлган. Ҳалок бўлганлар ёхуд жароҳат олганлар йўқ.
Бухоро вилояти Фавқулодда вазиятлар бошқармаси ёнғин хавфсизлик бошқармаси тезкор бошқарув маркази ёнғин ўчириш тезкор гуруҳи маълумотномасига кўра, ёнғин 2011 йилда туғилган боланинг гугурт билан ўйнаши оқибатида содир бўлган. Оқибатда шохобчага ҳамда тўйхонага тегишли яроқсиз балон ва резина буюмлар, целлофан ва картон бўлаклари сақланадиган усти ёпиқ айвон ва 19-сонли ёқилғи қуйиш шохобчасини туташтириб турувчи хизмат хонасининг ташқи деворларигина талофат кўрган.
Айвонда мавжуд бўлган бензин бакда ҳеч қандай ёнувчи суюқлик бўлмаган. Ёқилғи қуйиш шохобчаси ходимининг билдиришича, яроқсиз балон ва резина чиқиндилари тўпланадиган айвонда шохобча ёнидаги «Арсенал» тўйхонасига тегишли ўтинлар, бўш бакалашка идишлари ҳам кўп бўлган.
Савол туғилади: Боланинг гугурт ўйнаши оқибатида ёнғин содир бўлишига сабаб усти ёпиқ айвонда кераксиз, яроқсиз резина буюмлар ва чиқиндиларнинг тўпланиб, уюмлашиб қолганими ёхуд Бухоро туман фавқулодда вазиятлар бўлими томонидан ўз вақтида профилактик назорат ўрнатилмаганими? Маълум бўлишича, мазкур манзилда жорий йилнинг март ойида профилактик назорат ўтказилган.
«Дарё» мухбири 14 май куни кун давомида Бухоро туман фавқулодда вазиятлар бўлими раҳбари Лазиз Шодиев билан телефон орқали бир неча бор боғланиб, саволларга жавоб излашига қарамай, «мажлисдаман», «мажлисга киряпман», деган жавобнигина олган, холос.
Изоҳ (0)