Алиментдан қарздор чироқчилик ота қидирувга берилиб, 5 йил деганда топилди ва бўйнидаги қарийб 45 миллион сўмлик қарздорликни ўз вақтида тўламаганлиги учун 15 суткага қамалди. Бу ҳақда «Дарё»га МИБ Қашқадарё вилоят бошқармаси матбуот хизмати раҳбари Гулноза Дилмуродова маълум қилмоқда.
Аниқланишича, фуқаролик ишлари бўйича Чироқчи туман судининг 2014 йил 29 июлдаги қарорига асосан қарздор ота Ш.О.дан ундирувчи аёли Ф.Қ. фойдасига 3 нафар вояга етмаган фарзандининг моддий таъминоти учун алимент ундириш белгиланган. Бюронинг давлат ижрочилари томонидан берилган тушунтиришлар ва огоҳлантиришларига қарамасдан қарздор шу кунга қадар алимент тўлашдан бўйин товлаб келган. Натижада фуқаро Ш.О.нинг алимент қарздорлиги бугунги кунда 44 миллион 690 минг 451 сўмга етган.
Гулноза Дилмуродованинг сўзларига кўра, бюронинг Чироқчи туман бўлими давлат ижрочилари томонидан Ш.О. ўтган вақтнинг турли даврларида қидирувга берилган ва республика ҳудудидан четга чиқиш ҳуқуқи чекланган.
— Олиб борилган саъй-ҳаракатлар давомида фарзандининг моддий таъминотидан бўйин товлаб юрган ота жорий йилнинг 7 май куни бўлим давлат ижрочиси томонидан топилди, — дейди Гулноза Дилмуродова. — 8 май куни фуқаролик ишлари бўйича Чироқчи туман судининг сайёр суд мажлисида қарздор Ш.О. 15 сутка маъмурий қамоқ жазосига тортилди. Айтиб ўтиш керакки, фуқаро берилган жазодан тегишли хулоса чиқармаган тақдирда Ўзбекистон Республикаси Жиноят кодексининг 122-моддасига (Вояга етмаган ёки меҳнатга лаёқатсиз шахсларни моддий таъминлашдан бўйин товлаш) асосан жиноий жавобгарликка тортилади.
Изоҳ (0)