Германиялик кинооператор Ўзбеккино вакилларидан 65 минг евро талаб қилди

Дунёга машҳур операторлардан бири бўлган Макс Суй «Ўзбеккино» миллий агентлигига норозилик билдириб хат йўллади. Бу ҳақда ЎзА хабар берди.

Макс ўз хатида ўзбекистонлик ижодкор ёзувчи, продюсер ва сценарийнавист Анвар Иргашев ҳамда продюсер Юлия Медведовская уни янги «Герой» лойиҳасига постановкачи режиссёр сифатида чақиришга ваъда бергани, лекин орадан бир неча ой ўтса-да, лойиҳага уни жалб этмаганликларини баён қилган.

Макс Суйнинг ёзишича, бу бўйича музокаралар Беларусда бўлиб ўтиши ваъдалашилган. Лойиҳанинг молиялаштириш ишлари ҳал бўлмагач, Анвар Иргашев ва Юлия Медведовская Максни лойиҳага чақирмаган.

Макс Суй оғзаки келишувга кўра «Герой» лойиҳасига чақирилишига ишониб, бошқа шартномаларни бекор қилган. Эндиликда оператор Макс мазкур келишувнинг амалга ошмаганидан 65 минг евро миқдорида маблағ йўқотганини билдириб, бу пулларни ўзбекистонлик икки ижодкор тўлаб беришини талаб қилмоқда.

Макс Суй турли компаниялар билан ҳамкорликда ишлагани ва ўзининг жаҳон киносаноатидаги мавқеига ишора қилиб, унинг алданган ва бекор ўтказган вақти шунча нархга тенг эканини ёзган.

У «Ўзбеккино» миллий агентлигига ҳурматини изҳор қилиб, агентлик раҳбари Фурқат Зокировдан бу ишга бефарқ бўлмасликни сўраган.