Ўзбекистонда хорижга ўқиш ва малакага оширишга юбориладиган номзодлар учун инглиз тили курслари ташкил этилади
Олий ва ўрта махсус таълим вазирлиги ташаббуси билан хорижий олий ва илмий-таълим муассасаларига малака ошириш ва стажировка ўташ, магистратура ҳамда докторантурада ўқишга юборилиши режалаштирилаётган номзодларга инглиз тилини ўргатиш ўқув курслари ташкил этилмоқда.
Ўзбекистон давлат жаҳон тиллари университетида ташкил этилган семинар-тренингда 130 нафар тренер махсус тайёргарликдан ўтмоқда. Шу йилнинг 1 апрелидан бошлаб улар 22 та ОТМда хорижий тилларни ўргатиш бўйича ўқув курсларини олиб боради.
Чет тилини ўргатиш курслари 3 ой давом этади: бир ой мобайнида ОТМларда тренерлар томонидан ўқувлар олиб борилади, икки ой мобайнида тингловчилар дастур доирасида белгиланган топшириқларни онлайн режимида мустақил ўзлаштиришиб боришади.
Ўқув курсларида Британия кенгаши, Француз альянси, Гёте институти каби халқаро ташкилотларнинг малакали тренерлари ҳам иштирок этади.
Мазкур курсларга жами 1200 нафардан ортиқ тингловчи қамраб олинади. Уларни муваффақиятли ўзлаштирган педагог кадрларга 2020 йилда «Эл-юрт умиди» жамғарма стипендиати бўлиш учун ўтказиладиган танловда иштирок этиш ҳуқуқини берувчи сертификат берилади.
