Ўзбекистонда жисмоний шахсларга ҳам йўловчи ташишга рухсат берилади
Норматив-ҳуқуқий ҳужжатлар лойиҳаси муҳокамаси порталида Ўзбекистонда йўналишдаги таксилар фаолиятини янада такомиллаштиришга оид Президент қарори лойиҳаси жойлаштирилди.
Ҳужжатга кўра, 2019 йил 1 июлдан:
Жисмоний шахсларга тўрт кишидан ортиқ бўлмаган йўловчи ўриндиқли енгил автомобилларда йўловчи ташишга рухсат берилади. Бунда улар якка тартибдаги тадбиркор сифатида электрон платформа орқали операторлар билан шартнома имзолаган бўлиши керак.
Йўловчи ташиш билан шуғулланадиган якка тартибдаги тадбиркорларга лицензия бериш учун давлат божи юридик шахсларнинг енгил автомобиллари учун белгиланган ставканинг 1,5 баробари миқдорида ўрнатилади;
Йўналишдаги такси қонунчиликда талаб қилинган кўринишда бўлиши учун машина эшиклари, олди капоти ва юкхона юзасига ўзи ёпишадиган материаллар туширишга рухсат берилади;
Рейсдан аввал йўналишдаги таксилар махсус пунктларда тиббий ва техник кўрикдан ўтказилади;
Йўналишсиз такси сифатида фойдаланишга мўлжалланган енгил автомобиллар ижара шартномасини нотариал расмийлаштириш талаби бекор қилинади;
Юридик шахсларга қарашли таксиларга йўл ёқасидаги парковкалар, аэропортлар, вокзаллар, автостанциялар, савдо марказлари ҳамда марказий бозорлар парковкаларидан бепул фойдаланиш ҳуқуқи тақдим этилади.
