Бугун, 26 март куни Ўзбекистон ахборот ва оммавий коммуникациялар агентлигида иштирокида «Ўқитувчиларнинг жамиятдаги нуфузини ошириш билан боғлиқ муаммолар ва уларнинг ечимлари» мавзусида матбуот анжумани бўлиб ўтди, деб хабар берди «Дарё» мухбири Севара Нишонова.
Матбуот анжуманида иштирок этган Ўзбекистон халқ таълими вазири Шерзод Шерматов мактабларда ота-оналардан пул йиғилиш ҳолатлари сабабларига изоҳ берди.
Мактабларда пул йиғиш одатий ҳолга келиб қолган эди. Нега? Сабаби пул ажратилмаганидан кейин ‘Ҳамма нарсани ўзинг ҳал қиласан’, деган принципга ўтиб қолинган эди.Маълумот учун, 2018 йилнинг август ойида ўтказилган Халқаро пресс клубнинг «Мактаб таълими: ислоҳотларнинг янги босқичидаги муҳим ўзгаришлар ва муаммолар таҳлили» мавзусидаги сессиясида ҳам мактаблардаги синф ва мактаб фондига пул йиғиш ҳолатлари ҳақида сўз борган эди.Дунёдаги молиявий аҳволи яхши мактабларда нима қилинади? Мактабнинг инфратузилмаси учун маҳаллий ҳокимият органлари жавобгар бўлади. Ўқитувчининг вазифаси фақат дарс ўтиш бўлади.
Бизда шунча йил нима бўлган? Маҳаллий ҳокимиятга деб ташлаб қўйилган. Мактаб таъмирини маҳаллий ҳокимият қилсин, дейилган. Лекин маҳаллий ҳокимиятга пул ажратилмаган. Пул бермагандан кейин нима қилади, бечоралар?
Кейин мактабга комиссия келиб, ‘Мана бу ердаги парданг ёмон экан, алмаштир, партанг синган экан, тузатиб қўй’, дейди. Ўқитувчи нима қилсин, тузатишга молиявий манбаси йўқ. Кейин мана шунақа пул йиғишлар одат тусига кириб қолган. Шунинг учун биз давлат сифатида ҳамма шароитни яратиб қўйишимиз керак. Мактаб ўқитувчисини пул йиғадиган даражага олиб келиб қўйишимиз керак эмас.
Бунинг учун давлат бюджетидан ҳам, маҳаллий бюджетдан ҳам қўшимча маблағ ажратилиши керак. Агар ҳамма шароити бўла туриб, пул йиғаётган бўлса, бу фирибгарлик бўлади. Мен ҳеч кимни оқлаш ниятида эмасман, пул йиғилиши сабабини тушунтириб беряпман. Чунки мен янги келган соҳамнинг ичига кириб ўрганишга ҳаракат қилдим-да.
Ана энди, пул йиғишга бошқа сабаблар ҳам бор эди. Масалан, мажбурий меҳнат: кўча супуришга, пахта теришга олиб чиқаётгандик. Бу ишларга ўқитувчи ўзи бормайди, одам ёллаб, жўнатиб, ёнидан пул тўлайди. Бу дегани яна пул йиғиш керак. Ёки мажбурий обуна масаласи. 20 тага газетага обуна бўлиш керакми? Униям ўзи қила олмайдику, яна пул йиғилади. Шу нарсаларга барҳам берганимиздан кейин пул йиғиш ҳолатлари анча камайди.
Шерзод Шерматов, Ўзбекистон халқ таълими вазири
Шерзод Шерматов ўшанда ҳолатни қуйидагича изоҳлаган эди:
«Ҳозир мен сентябрдан бошлаб ҳеч қайси мактабда пул йиғилмайди, десам ёлғончига айланиб қоламан. Мактаб ўқитувчиларининг ойлиги оширилди, келгусида мактабларни ривожлантириш учун инвесторлар жалб этилади, мажбурий обуна тизими бекор қилинди. Вилоят ҳокимликлари ҳам мактабларни таъмирлаш учун имкон қадар кўмак бермоқда.
Мактабларда пул йиғ-йиғларнинг кўплиги сабабларидан бири текширувларнинг кўплиги. 207 минг марта текширув бўлган экан мактабларнинг ҳаммасида. Ҳар бир текширувчи бу харажат дегани. Ҳеч бўлмаганида уларнинг тушлиги ўқитувчиларнинг зиммасига тушади. Мажбурий обуна, кўчани ободонлаштириш ҳам бу иллатнинг кўпайишига сабаб бўлган. Босқичма-босқич бу нарса камайиб, охири йўқ бўлиши керак».
Изоҳ (0)