Баъзан ажойиб қўшиқни эшитиб, хонанда қайси мамлакатдан эканини билмай қоламиз. «Kaktakto» ўз овози билан дунёни забт этган 15 нафар хонанда ҳақида ёзди.
Қозоғистон
Димаш Кудайберген
Энг машҳур қозоқ вокалисти, инструменталисти ва композитори. Димашнинг овоз диапозони олти октава. У Хитойдаги машҳур Singer 2017 телешоусида қатнашиб, шуҳрат қозонган. Нуфузли қўшиқчилар билан беллашиб, финалгача борган ва иккинчи ўринни эгаллаган.
Димаш рус, испан, инглиз, француз ва бошқа тилларда қўшиқ куйлайди.
Скриптонит
Скриптонит тахаллуси билан ижод қилувчи қозоғистонлик рэпернинг асл исми Адил Жалелов.
У 1990 йил 3 июнда Павлодарда (Қозоғистон) туғилган. 11 ёшида реп йўналишида куйлай бошлаган. Ҳаммаси Децлнинг қўшиқларига бўлган қизиқишидан бошланган.
15 ёшидан бошлаб Адил ўзи қўшиқ ёзган. 16 ёшида эса биринчи марта нисбатан катта саҳнада қўшиқ айтган. Ануар билан бирга VBVVCTND трекига ишланган клипдан сўнг машҳур бўлиб кетган.
2015 йил 24 ноябрда узоқ кутилган ҳодиса юз берган: «Дом с нормалними явлениями» (Оддий ҳодисалар бўладиган уй) альбоми чиққан. У тезда муваффақият қозониб, iTunes чартида иккинчи ўринни олган. 2016 йил сентябрда Россиянинг GQ эркаклар журнали Скриптонитни «Йил кашфиёти» деб эътироф этган.
Jah Khalb
Бахтиёр Мамедов (рэпернинг ҳақиқий исми) 1993 йил 23 сентябрда Қозоғистонда мусиқачилар оиласида туғилган. 5-синфдан Бахтиёр мусиқа мактабига қатнай бошлаган. У ерда саксофон чалишни ўрганган.
13 ёшидан бошлаб Бахтиёр студияларда минусовкалар ёзган. Уларни интернетга жойлаб, арзон нархга сотган.
2014 йил 10 та қўшиқдан иборат «Все, что мы любим» (Биз севган ҳамма) номли биринчи альбомини чиқарган. 2017 йилда эса Медина қўшиғи учун «Олтин граммафон» мукофотини қўлга киритган.
Линда
Россиялик қўшиқчи 1977 йил 29 апрелда Қозоғистоннинг Кентау шаҳрида таваллуд топган. У трип-рок йўналишида ижод қилади.
Линда учун биринчи мусиқа муаллифи бастакор Максим Фадеев бўлган. Кейинчалик эса Линда ўзи шеър ва мусиқа ёзишни бошлаган ва Евгений Поздняков, Мара ва Любаша каби муаллифлар билан ҳамкорлик қилган. Карьераси давомида қўшиқчи Россияда 3 миллиондан ортиқ альбом сотган.
А-студио
Гуруҳга қозоқ мусиқачиси Байгали Серкебаев асос солган. 1987 йилга қадар гуруҳда Роза Римбаева ҳам бўлган. Айни пайтда гуруҳда беш нафар иштирокчи: Байгали Серкебаев, Владимир Миклошич, Кети Топурия (солист), Евгений Дальский (зарбли мусиқачи) ва Сергей Кумин (гитарачи) бор.
2000 йилларга қадар Батирхон Шукенов вокалчи ва гуруҳнинг юзи эди. Ўша даврнинг машҳур қўшиқлари «Жулия» ва «Нелюбимая» (Севилмаган) бўлган. Кети коллективда пайдо бўлган даврда «Улетаю» (Учаман), «Также как все» (Ҳаммага ўхшаб), «Толко с тобой» (Фақат сен билан), «Тик-Так» қўшиқлари хит бўлган.
Натан
Қўшиқчи 1986 йил 17 мартда Олмаотада туғилган. Болалигиданоқ санъатга қизиқиб, шеърлар ёзган. Мусиқий фаолиятини «Синдикат» гуруҳида бошлаган.
Унинг ҳақиқий исми Натан Миров. «Слыш, ти что такая дерзкая?» (Эй, нега бунча қўполсан?) қўшиғи билан машҳурликка эришган. У Black Star ёрлиғининг таркибига киради.
Назима
Назима Жанибекова асли чимкентлик. 1990 йил 21 октябрда туғилган. Анъанавий мусулмон оиласида тарбия топган. Болалигидаёқ саҳнада қўшиқ айтишни орзу қилган. 12 ёшида қозоқ тилидаги қўшиғи билан «Очаровашка» халқаро танловининг ғолиби бўлган.
21 ёшида «Фабрики звезд» (Юлдузлар фабрикаси) нинг қозоқча версиясининг финал босқичигача борган. «Хочу стат звездой» (Юлдуз бўлишни хоҳлайман) лойиҳасида иштирок этганидан сўнг Назима ALTYN GIRLS триосининг солистига айланган. Аммо кўп ўтмай бу гуруҳ тарқаб кетган. Назима «Песни на TNT» (TNT’да қўшиқлар) мусобақасида қатнашган. У ерда Тимати қизнинг иқтидорини кўриб, Black Star жамоасига таклиф қилган.
Қирғизистон
Кайрат Примбердиев
Қирғизистонлик истеъдодли мустақил ривожланган қўшиқчи. У ўзининг вокал маҳорати билан юртдошларининг кўнглидан жой олган ва «Главная сцена» (Асосий саҳна) ва «Голос» (Овоз) каби телекўрсатувлар орқали Россияда машҳур бўлган.
Кайрат Ўш вилоятида туғилган. 14 ёшида Кайрат Примбердиев Қирғизистоннинг «Манас» халқ эпоси тўгарагига қатнашган, сўнг Марказий Осиёнинг анъанавий чолғу асбоби комуз чалишни ўрганган. Вояга етгач, вокал дарсларини олишга киришган.
Город 312
Гуруҳ 2001 йил 14 октябрда ташкил топган. Бишкек шаҳрининг телефон коди 312 бўлгани сабаб, у гуруҳга шундай ном берилган. Гуруҳ жуда машҳур альбомларни чиқарган: «Вне зони доступа» (Хизмат доирасидан ташқарида), «213 дорог» (213 йўл), «Обернис» (Ўгирил), «Новая музика» (Янги мусиқа) ва бошқалар.
Гуруҳ «Энг яхши россиялик ижрочи» йўналишида MTV Europe Music Award мукофотини қўлга киритган.
Унинг қўшиқлари кўпинча рус фильмларига саундтрек сифатида фойдаланилади.
Ўзбекистон
Согдиана
Қўшиқчининг асл исми Оксана Нечитайло. У 1984 йил 17 февралда Тошкентда муҳандис ва шифокор оиласида туғилган. Ота-онаси қизининг қобилиятини ривожлантириш учун уни Глиер мусиқа мактабига берган. 2001 йилда Оксана Ўзбекситон давлат консерваториясида эстрада йўналишида ўқишни бошлаган. Худди шу йили унинг биринчи альбоми «Менинг кўнглим» чиққан. Ундан ўзбек, рус ва инглиз тилидаги қўшиқлар ўрин олган.
2006 йилда Оксана Москвага бориб, «Фабрики звезд-6»нинг иштирокчисига айланган. Лойиҳа унга машҳурлик олиб келган.
Наргиз Закирова
Қўшиқчининг асл ватани Тошкент шаҳри. Наргиз 1971 йил 6 октябрда мусиқачилар оиласида туғилган. Бобоси Ўзбекистон операси асосчиси, амакиси СССРда машҳур «Ялла» гуруҳининг етакчи хонандаси бўлган.
Ёшлик чоғида Наргиз «Унутма мени» қўшиғи билан «Юрмале-86» да иштирок этган. Цирк мактабининг вокал бўлимида ўқиган. Экстравагант образда қатнашгани учун уни ўзбек Мадоннаси деб аташган. Эридан ажрашганидан сўнг, Наргиз АҚШга кўчиб кетган, у ерда у мусиқа билан шуғулланишни давом эттирган.
2013 йилда Наргиз «Голос» (Овоз) лойиҳасининг иштирокчисига айлангани унга Россияга машҳур қилган. Унинг Максим Фадеев билан куйлаган дуэтини YouTube’да 149 миллион нафар одам томоша қилган.
Севара Назархон
Севара 1976 йил 23 декабрда Андижонда туғилган. 1998 йилда Тошкентга келган ва Консерваторияга ўқишга кирган.
2000 йил «Бахтимдан» альбоми чиқиб, Севарани Ўзбекистонга танитган.
Алексей Чумаков
Алексей 1981 йил 12 мартда Самарқандда туғилган. Беш ёшидан куйлай бошлаган. Ота-онаси кейин уни мусиқа мактабига берган. «Халқ артиси — 2003» лойиҳаси унга шуҳрат келтирган.
У «Песня о любви» (Севги ҳақида қўшиқ), Тут и там (Бу ерда ва у ерда), «Небо в твоих глазах» (Осмон сенинг кўзларингда) ва бошқа қўшиқлари билан машҳур.
MC Doni
Достонбек Исмаилов (рэпер ва DJ’нинг ҳақиқий исми) 1985 йил 18 декабрда Тошкентда туғилган. Лекин болалиги Фарғонада ўтган.
Ўзбекистонда у DJ’лик фаолиятини бошлаган. Москвага кўчиб ўтгач, клубларда қўшиқ айтган.
Россия қўшиқчиси Натали билан ишланган клипи «А ты такой…» (Сен эса шундайсан…) YouTube’да 188 миллион фойдаланувчи томонидан томоша қилинган.
Тожикистон
Жасмин Каримова
Жасмин Тожикистонда туғилган. Болалиги Австралия, АҚШ ва Голландияда ўтган.
2015 йилда «Голос» лойиҳасининг голланд версиясида Жасмин ҳакамларни ҳайратда қолдирган. 2017 йилда L’One билан «Дорога» (Йўл) клипини чиқарган.
Изоҳ (0)