Ўзбекистон Президенти Администрацияси раҳбари томонидан 7 март куни қабул қилинган фармойишга мувофиқ, Ахборот ва оммавий коммуникациялар агентлиги директорининг ўринбосарлари тасдиқланди. Бу ҳақда агентликнинг матбуот хизмати маълум қилди.
Агентлик директорининг биринчи ўринбосари лавозимига Авазбек Хожиметов тайинланди. Авазбек Хожиметов меҳнат фаолиятини Ташқи ишлар вазирлиги тизимидаги «Жаҳон» ахборот агентлигида бошлаган. 2017 йилдан шу кунга қадар Ўзбекистон Президенти Матбуот хизмати ахборот-таҳлил ишлари бўйича сектори мудири лавозимида ишлаб келган.
Авазбек Хожиметов Агентлик директорининг биринчи ўринбосари сифатида давлат ахборот сиёсатини амалга ошириш, соҳага оид қонунчиликни такомиллаштириш, ахборот хавфсизлигини таъминлаш, ахборот таҳлили ҳамда оммавий ахборот воситалари фаолиятини ривожлантириш каби вазифаларни бажариш учун масъул бўлади.
Агентлик директори ўринбосари лавозимига Наргиза Рахимова тайинланди. Меҳнат фаолиятини 1999 йили Ўзбекистон Республикаси Олий хўжалик судида маслаҳатчи лавозимида бошлаган. 2006 йилдан буён ахборот, журналистика соҳаси бўйича қатор лавозимларда фаолият кўрсатган. «Деловой партнер», «Биржа» каби газеталар, қатор электрон оммавий ахборот воситаларида масъул лавозимларда, Президент Девони медиа марказида бош мутахассис лавозимида фаолият юритган.
Наргиза Рахимова Ахборот ва оммавий коммуникациялар агентлигида Ўзбекистон Республикасининг чет элларда ижобий имижини шакллантириш – PR-марказ вазифаси ижроси, шунингдек, агентликнинг давлат органлари ахборот хизматлари фаолиятини мувофиқлаштириш каби вазифалар учун масъул бўлади.
Агентлик директорининг ўринбосари лавозимига Ғайрат Бозоров тайинланди. Ғайрат Бозоров меҳнат фаолиятини Ўзбекистон матбуот ва ахборот агентлигида бошлаган. 2018 йилдан буён шу кунга қадар нашриёт-матбаа ижодий уйи директорининг нашриёт ва маркатенг масалалари бўйича ўринбосари лавозимида ишлаб келаётган эди.
Ғайрат Бозоров Агентлик директорининг ўринбосари сифатида лицензиялаш ва назоратни ташкил этиш, нашриёт-матбаа соҳаси, китоб савдоси ва ахборот кутубхона ресурслари фаолиятини ривожлантириш каби вазифаларни бажариш учун масъул бўлади.
Изоҳ (0)