26 февраль куни Тошкентда АҚШнинг халқаро ривожланиш бўйича агентлигининг (USAID) Ўзбекистондаги суд-ҳуқуқ ислоҳотига доир дастури тақдимоти ўтказилди. Бу ҳақда Адлия вазирлигининг матбуот хизмати «Дарё»га маълум қилди.
Фото: Адлия вазирлиги матбуот хизмати
Тадбирда адлия вазири Русланбек Давлетов, USAID ва бошқа халқаро ташкилотлар, фуқаролик жамияти институтлари вакиллари иштирок этди.
USAID’нинг Ўзбекистондаги суд-ҳуқуқ ислоҳотига доир дастурининг амалга оширилиши ўтган йилнинг 8 июнида Ўзбекистон Республикаси Адлия вазирлиги ва USAID ўртасида имзоланган ўзаро англашув меморандумида кўзда тутилган. Дастур уч йил муддатни қамраб олган бўлиб, қиймати 10 миллион АҚШ долларидан ортиқдир.
Фото: Адлия вазирлиги матбуот хизмати
USAID’нинг Ўзбекистонда суд-ҳуқуқ ислоҳотига доир дастури Адлия вазирлиги ҳамда турли давлат органлари ва ташкилотлари, фуқаролик жамияти институтлари билан ҳамкорликда амалга оширилади. Мазкур дастур 2017—2021 йилларда Ўзбекистонни ривожлантиришнинг бешта устувор йўналиши бўйича ҳаракатлар стратегиясида белгиланган асосий мақсадларга эришишга янгича туртки бўлади. Хусусан, юристлар малакасини ошириш бўйича янги имкониятлар яратилади, қўшма тадқиқотлар ўтказиш, кутубхоналар, онлайн-таълим ва тадқиқот ресурслари имкониятларини кенгайтириш мақсадида АҚШ университетлари билан шериклик муносабатлари ўрнатилади.
