Петербург ҳукумати ҳалок бўлган ўзбекистонликнинг жасадини ватанига юбориш харажатларини зиммасига олади
Петербургда ҳалок бўлган ўзбекистонлик талабанинг жасадини ватанига юборишнинг барча харажатларини Шимолий пойтахт ҳукумати зиммасига олади. Бу ҳақда Ўзбекистон элчихонаси маълумотига таяниб, «Podrobno.uz» хабар бермоқда.
Ҳукумат, шунингдек, уни дафн этиш учун пул ажратади. Талабанинг ота-онаси Петербургда эканлиги қайд этилмоқда.
«Элчихона ҳукумат, терговчилар билан алоқада. Ҳалок бўлган талабани тезроқ ватанига қайтаришга ҳаракат қилаяпмиз. Ўзбекистон миллий авиакомпанияси ёрдам беришга тайёр. Вазият назорат остида», — дейилади элчихона хабарида.
Эслатиб ўтамиз, аввалроқ 5 февраль куни Санкт-Петербургнинг Кимё-фармацевтика давлат университети талабаси бўлган ўзбекистонлик 23 ёшли Бобурбек Очилов томдан муз бўлаги тушиши оқибатида вафот этганлиги ҳақида хабар берилган эди. Унинг дўсти ва тенгдоши Баҳрулло Умаров эса бир неча жароҳатлар билан Марианск касалхонасига ётқизилган.
