Андижон давлат университетида Европа иттифоқи «Erasmus+» дастури қўшма лойиҳаси доирасида қайта тикланувчи энергия манбалари лабораторияси очилди. Бу ҳақда университет матбуот хизмати «Дарё»га хабар бермоқда.
Лабораторияга Германия, Италия, Испания ва бошқа ривожланган давлатларда ишлаб чиқарилган, қиймати 42,7 минг евролик 30 турдаги жиҳоз ўрнатилди. Лойиҳа бош мувофиқлаштирувчиси этиб ЛъАкуила университети (Италия) профессори Анна Тосси ҳамда миллий координатор сифатида университет профессори Райимжон Алиев тайинланди.
Лаборатория Европанинг 600 дан зиёд нуфузли университети онлайн тарзда уланган Оксфорд университетининг Резерфорд лабораторияси микроэлектроника ва наноэлектроника қўллаб-қувватлаш марказининг Эуропраcтиc тизимига уланган. Андижон давлат университети Урганч давлат университетидан сўнг Ўзбекистонда мазкур тизимга онлайн уланган иккинчи олий таълим муассасасига айланди.
Лойиҳа доирасида университетда 2018/2019-ўқув йилидан бошлаб «Қайта тикланувчи энергия манбалари ва барқарор атроф-муҳит» мутахассислиги бўйича магистрлар тайёрланмоқда. Улар учун Европа стандартлари асосида 12 та ўқув дастури ишлаб чиқилди.
Қайта тикланувчи энергия манбалари лабораториясининг очилишига бағишланган тадбирда Санкт-Петербург политехника университети, Ўш давлат университетининг бир гуруҳ профессор-ўқитувчилари ҳамда маҳаллий олимлар, талабалар қатнашди.
Олий ва ўрта махсус таълим вазирлиги ҳамда Европа иттифоқининг «Erasmus+» дастури ҳамкорлигидаги мазкур лойиҳа доирасида келгусида Гулистон ва Қарши давлат университетлари, Тошкент шаҳридаги Турин политехника университети, Тошкент автомобиль йўллари институтида ҳам ана шундай лабораторияларни яратиш кўзда тутилган.
Изоҳ (0)