Украина президентлигига биринчи номзод ҳужжатларини Марказий сайлов комиссиясига топширди
Украина президентлигига биринчи номзод, ҳуқуқшунос Игорь Шевченко ўз ҳужжатларини Марказий сайлов комиссиясига топширди. Шевченко собиқ экология ва табиий ресурслар вазири ҳисобланади. Бу ҳақда «Вести.ru» хабар берди.
2019 йилнинг март ойида бўлиб ўтадиган президентлик сайлови кампанияси Янги йил байрами арафасида бошланди. Сайлов 2019 йилнинг 31 мартида бўлиб ўтади.
Президентликка номзодлик учун ҳижжатларни қабул қилиш жараёни 2019 йилнинг 3 февралигача давом этади. Ижтимоий сўровлар натижаларига кўра, президентлик рейтингида «Баткившина» партияси раҳбари Юлия Тимошенко етакчи бўлиб қолмоқда. У президентлик пойгасида иштирок этишга тайёр эканлигини маълум қилган. Рейтингда иккинчи ўринни актёр ва комик Владимир Зеленский эгаллаб турибди.
Амалдаги президент Пётр Порошенко ҳозирча иккинчи муддат учун курашиш истагини расман эълон қилгани йўқ. Украинанинг 10 та шарқий вилоятида ҳарбий ҳолатнинг жорий қилиниши ҳисобига Порошенконинг рейтинги бироз кўтарилган, бироқ унинг овоз беришнинг иккинчи турига чиқиши савол остида турибди.
