Ўзбекистон истеъмолчилар ҳуқуқларини ҳимоя қилиш жамиятлари федерацияси делегацияси 14 декабрь куни Сеул шаҳри ҳокимлигида Корея истеъмолчилар иттифоқининг ижрочи директори Жунг Жу Ён хоним билан учрашди. Бу ҳақда ЎзА хабар берди.
Кореяда биринчи бўлиб ташкил этилган истеъмолчилар ушбу жамоатчилик ташкилоти Сеул шаҳри ҳукумати билан бирга 2004 йили электрон тижорат соҳасида истеъмолчилар манфаатларини ҳимоя қилиш мақсадида Сеул электрон тижорат марказига асос солган эди.
Иккала ташкилотнинг бу борадаги ҳамкорлиги давлат билан хусусий сектор шериклигига асосланади.
Корея истеъмолчилар иттифоқи делегация учун «Сеул электрон тижорат марказининг роли ва фаолияти» мавзусида суҳбат уюштирди.
Қайд этилишича, бугунги кунда электрон тижорат, яъни товарларни интернет орқали сотиш жадал ривожланиб бормоқда ва ушбу соҳада истеъмолчиларнинг ҳуқуқ ва манфаатларини ҳимоя қилиш долзарб вазифага айланиб қолди.
Марказ истеъмолчиларга электрон тижорат орқали товар сотиш билан шуғулланаётган компанияларнинг электрон дўконлари, яъни веб-сайтлари фаолиятини кузатиб ва баҳолаб боради. Қаллобликка йўл қўйган компаниялар вебсайтларини ёпиш тўғрисидаги унга хостинг берган сервер жойлашган ер маҳаллий ҳокимликка сўров юборади.
Маълумот учун:
Иттифоқ нодавлат ташкилоти ҳисобланади. Унинг мамлакат бўйлаб 9 та филиали мавжуд. Аъзолари сони – 45 минг киши. Халқаро истеъмолчилар ташкилоти аъзоси.
Қайд этиш жоизки, Ўзбекистон истеъмолчилар ҳуқуқларини ҳимоя қилиш жамиятлари федерациясининг Корея истеъмолчилар агентлиги билан имзолаган ўзаро ҳамкорлик меморандумида электрон тижорат соҳасида истеъмолчиларнинг ҳуқуқларини ҳимоя қилиш ҳам кўзда тутилган.
Изоҳ (0)