Хоразм вилояти давлат солиқ хизмати органлари ҳамда Мажбурий ижро бюроси вилоят бошқармаси ходимлари ҳамкорлигида солиқ тўловчиларнинг бюджет ва давлат мақсадли жамғармалари олдидаги солиқ қарздорлигини қисқартириш юзасидан тадбир ўтказди. Бу ҳақда ЎзА хабар берди.
Ҳамкорликда олиб борилган тадбирлар жараёнида 2 минг 249 тадбиркорлик субъектининг солиқларни ўз вақтида тўламасдан, фаолият юритаётгани аниқланди. Шундан 946 тасининг мол-мулклари хатловга олинди. 1 минг 854 қарздорларнинг 12,4 миллиард сўмлик солиқ қарзлари давлат фойдасига ундирилди. Хусусан, Хива туманидаги «Хиванефтгазқурилиш» корхонасининг 317 миллион сўмлик «Solor 210» русумли экскаватори ва Isuzu русумли автобуси, Шовот туманидаги «Шовот машина трактор парки» МЧЖнинг 111,5 миллион сўмлик Case русумли трактори ва Урганч туманидаги «Хударган Умид» хусусий корхонасининг 12,4 миллион сўмлик солиқ қарзи юзасидан корхонага қарашли юк ортувчи транспорт воситаси суд ҳужжатлари асосида қарздорлик ҳисобига хатланди.
Давлат томонидан кенг имкониятлар яратиб берилаётган бўлса-да, белгиланган нормаларга риоя қилмасдан, ўз манфаатини давлат манфаатидан устун қўйиб, йирик солиқ қарздорлигининг келиб чиқишига сабабчи бўлаётганларнинг ҳам мавжудлиги киши дилини хижил қилади. Бюджет ва давлат мақсадли жамғармаларидан солиқ қарзи мавжуд жами 35,1 мингта қарздорнинг 79,4 миллиард сўмлик, шундан 12,9 мингта юридик шахсларнинг 68,9 миллиард сўмлик, 8 мингта жисмоний шахснинг 4,5 миллиард сўмлик, 14,2 мингта якка тартибдаги тадбиркорнинг 6 миллиард сўмлик қарздорлиги мавжуд. Амалдаги қонунчилик талабларини қўпол равишда бузиб, солиққа оид ҳуқуқбузарликлар содир этган 660 нафар шахсга нисбатан 63,4 миллион сўм маъмурий жарима қўлланилди.
Ўтказилган профилактик тадбирлар давомида тўғри хулоса чиқариб, ҳуқуқбузарлик оқибатларини бартараф этган ҳамда солиқлар ва бошқа мажбурий тўловлар, шу жумладан, пенялар ва бошқа молиявий санкциялар тарзида давлатга етказилган зарарнинг ўрнини тўлиқ қоплаган 113 нафар тадбиркорлик субъектининг мансабдор шахслари ва якка тартибдаги тадбиркорлар маъмурий жавобгарликдан озод этилди.
Изоҳ (0)