Ўзбекистонда жорий йилнинг ўтган даври мобайнида маҳаллалар қошидаги яраштириш комиссиялари томонидан 64 минг 214 та мурожаат кўриб чиқилиб, салкам 40 минг ҳолатда қайнона-келин, келин ва оиланинг бошқа аъзолари ўртасидаги келишмовчиликларга барҳам берилди. Бу ҳақда ЎзА хабар берди.
Қарийб 7 минг ҳолатда қариндошлар муросага келтирилган. Шунингдек, жорий йилнинг ўтган олти ойи давомида маҳалла фуқаролар йиғинлари томонидан оилаларда ижтимоий-маънавий муҳитни соғломлаштириш мақсадида кўплаб муҳокамалар ўтказилди. Натижада 11 минг 209 оиланинг низоларига барҳам берилди. 4414 оила ажримдан сақлаб қолинди.
Ажрим кўрсаткичлари ошган маҳаллаларда оилавий муносабатларни мустаҳкамлаш ойлиги доирасида фуқаролар йиғини кенгаши аъзоларининг оилалар билан ишлашдаги малакасини оширишга алоҳида эътибор қаратилди. Турли келишмовчиликлар сабабли ажрим ёқасига келиб қолган оилаларга намунали оилалар бириктирилди.
Аҳамиятли жиҳатлардан яна бири — маҳаллаларда «Энг яхши қайнона-келин», «Ибратли қайнота» мавзусидаги кўрик-танловлар ташкил этилиб, аҳоли ўртасида оила муносабатларини соғломлаштиришга қаратилган сўровномалар мунтазам ўтказилмоқда.
Изоҳ (0)