Мьянманинг жанубий соҳилларида экипажсиз «арвоҳ-кема» саёзликка ботиб қолди. Бу ҳақда «РИА Новости» хабар бермоқда.
Сам Ратуланги ПБ 1600 номли юк ташувчи соҳилдан бир неча километр нарида саёзликка ботиб қолган. Унинг сув сиғими 26,5 минг тонна, узунлиги 177 метр экани айтилмоқда.
Маҳаллий балиқчилар саёзликка ботиб қолган улкан кемага чиққан, бироқ унинг ичида на экипаж аъзоларини, на бирор юкни топган.
«Бундай катта кема қандай қилиб бизнинг ҳудудимизга келиб қолгани тушунарсиз. Ҳукумат ушбу кемани кўздан кечиради», — деди маҳаллий парламент аъзоси Не Уин Янгон.
Кемани сўнгги бор 2009 йили Тайвань соҳиллари яқинида, Индонезия байроғи остида кўришган. Маҳаллий маъмуриятнинг фикрича эса, экипаж кемани яқинда тарк этган.
Ҳозирги вақтда кема эгасининг шахсини аниқлаш ишлари олиб борилмоқда.
Изоҳ (0)