7 август куни Пекинда Ўзбекистон Республикаси Ташқи иқтисодий фаолият Миллий банки ва Хитойдаги етакчи лойиҳачи компаниялардан бири бўлмиш China Construction Engineering Design Group Corporation Ltd архитектура ва дизайн компанияси ўртасида Самарқанд шаҳрининг бош режаси концепциясини ишлаб чиқиш ва Samarkand City туристик зонаси ҳамда ШҲТ-2022 саммити муносабати билан қуриладиган объектларни назарда тутадиган шаҳарсозлик макони ташкил этиш бўйича шартнома имзоланди.
Келишувга кўра ушбу ишга бош режачи, тажрибали шаҳарсоз, профессор Сун Сяолун раҳбарлигидаги лойиҳачилар гуруҳи жалб этилади.
Ушбу тадбирлар Ўзбекистон Республикаси президенти Шавкат Мирзиёевнинг Самарқанд шаҳри мезбонлик қиладиган 2022 йилги Шанхай ҳамкорлик ташкилоти йиғилишига тайёргарлик кўриш бўйича қарори ижроси юзасидан амалга оширилади.
Шу йилнинг июнида Ташқи иқтисодий фаолият Миллий банки Пекинда «Хитой Ипак йўли» фонди билан Samarkand City туристик зонаси қурилиши лойиҳаси бўйича англашинув меморандумини имзолаганди. Мазкур лойиҳа Самарқанд шаҳрининг машҳур тарихий ва маданий марказ сифатидаги туристик салоҳиятини ошириш ва «XXI аср Ипак йўли дурдонаси» яратилишини ўз ичига олади.
China Construction Engineering Design Group Corp. Ltd. – Хитойнинг етакчи лойиҳачи компанияси бўлиб, 2017 йил якунларига кўра 1,58 млрд доллар ишлаб, мамлакатдаги лойиҳачи ташкилотлар ўртасида иккинчи бўлган. Таъсисчиси – China State Construction Engineering Corp. Ltd. (CSCECL), дунёдаги йирик қурилиш корпорацияси ҳисобланади, Forbes баҳоларига кўра, бу корпорация Глобал—2000 рейтингида 84-ўринни эгаллайди, 2018 йил июнь ойи ҳолатига кўра унинг бозор қиймати 40,4 млрд долларни ташкил этади, даромадлари – 162,3 млрд доллар, активлари – 257,6 млрд доллар, фойдаси - 5,1 млрд доллар, ходимлари сони – 270,5 минг нафарга тенг.
Реклама ҳуқуқи асосида
Изоҳ (0)