Зафар Ҳошимов Голландияда отилган 101 ўзбекка бағишланган фильмга қўшган ҳиссасидан мамнунлигини билдирди
«Korzinka.uz» супермаркетлар тармоғи раҳбари Зафар Ҳошимов Facebook’даги саҳифасида Иккинчи жаҳон уруши чоғида Голландияда отилган 101 ўзбекка бағишлаб фильм тасвирга олиш ғоясига унинг ҳам ҳиссаси қўшилганидан мамнун эканлигини билдирди.
Маълум бўлишича, тадбиркор аввалроқ саҳифасида уруш йиллари Голландия ўрмонларида жойлашган Амерсфорт концлагерида 101 ўзбекистонликнинг жасоратлари ва қайғули тақдирлари ҳақида ёзган. Уни ўқиган ёзувчи ва киносценарист Анвар Эргашев бизнесмен билан учрашиб, бу ҳодиса ҳақида унга маълум ахборотлар ва материаллар билан улашишини сўраган.
«Ўша учрашувимиздан сўнг Анвар ака турмуш ўртоқлари Юлия билан жуда катта изланишлар олиб бориб, Голландияга бориб, ўша ҳодисалар гувоҳлари билан суҳбатлашиб, юзлаб, минглаб ҳужжатларни кўтариб, натижада "101" номли тарихий роман битибдилар. Ўтган шанба куни бизнинг офисга келиб, ушбу романнинг сигнал нусхасини менга ҳадя этдилар, — деб ёзди Зафар Ҳошимов. — Бугун эса яна бир хушхабар келди… муҳтарам Президентимиз ушбу роман асосида бадиий фильм олиниши ҳақидаги қарорга имзо чекибдилар. Қаҳрамон ватандошларимиз жасорати бу тариқа абадийлаштиришида камтарин ҳиссамдан жуда мамнун ва мағрурман».
Президентнинг 24 июлдаги миллий киносаноатни ривожлантириш бўйича қўшимча чора-тадбирлар тўғрисидаги қарорига илова қилинган «Йўл харитаси»да 2020 йил февралига қадар «101» номли бадиий фильм суратга олиш ҳақида кўрсатма берилган. Иккинчи Жаҳон урушида фашизмга қарши курашда қатнашган ўзбекистонликлар номини абадийлаштиришга бағишланган фильм «101» номли роман асосида суратга олинади.
