Тошкент вилоятида бугунги кунда реабилитация марказларида олиб борилаётган ишлар қатъий назорат остида янгидан ташкиллаштирилган. Марказга олиб келинган шахслар тўлиқ тиббий текширувдан ўтказилиб, соғлигида муаммо бўлса, соғлигини тиклаш мақсадида, шифохоналарга юборилмоқда. Бу ҳақда Тошкент вилояти ИИБ жамоатчилик ва ОАВ билан алоқалар бўлими «Дарё»га хабар берди.
Реабилитация марказларига олиб келинган шахсларнинг аксарияти соғлом турмуш тарзини бутунлай йўқотган, ичкиликбозликка муккасидан кетган. Айримлари эса, кексалиги ва ногиронлиги боис, меҳнатга яроқсиз кишилар.
Эндиликда турли ҳудудлардан келган, яшаш жойига эга бўлмаган шахслар яшаш ҳудудларига қайтариб юборилмайди. Шахсига, паспорт бўйича рўйхатга қўйилган турар жойига аниқлик киритилади. Шахсини тасдиқловчи ҳужжатлари бўлмаган, ёки биометрик паспорт олмаган шахслар реабилитация марказининг ўзида Миграция ва фуқароликни расмийлаштириш бошқармаси ходимлари томонидан мобил қурилма воситасида биометрик маълумотлар олиниб, жойлардаги мутасаддилар томонидан уларнинг яшаш жойлари ва бандлигини таъминлаш ишлари олиб борилмоқда.
Тошкент профилактика инспекторларига муайян яшаш жойига эга бўлмаган шахсларни топиш, уларни шахсини аниқлаш ва уларга ҳужжатлар тақдим этиш, тиббий кўрикдан ўтказиш ва ишга жойлашишга кўмаклашиш вазифаси юклатилди.
Яшаш жойига эга бўлмаган шахсларни реабилитация қилиш маркази бу ердаги мураккаб вазиятларга тушиб қолган шахслар учун янги ёки яхши ҳолатдаги эркаклар ва аёллар кийимларини ҳамда озиқ-овқат маҳсулотларини топшириш мумкинлигини маълум қилади.
Мурожаат қилиш учун телефон: 264-59-09.
Изоҳ (0)