Янгиланиш сари шаҳдам қадамлар
Вазирлар Маҳкамасининг «Миллий ҳайдовчилик гувоҳномасининг ҳамда автомототранспорт воситаси рўйхатдан ўтказилганлиги тўғрисидаги гувоҳноманинг янги намуналарини жорий этиш чора-тадбирлари тўғрисида» ги 2017 йил 2 мартдаги 116-сон қарори билан миллий ҳайдовчилик гувоҳномасининг ҳамда автомототранспорт воситаси рўйхатдан ўтказилганлиги тўғрисидаги гувоҳноманинг янги намуналари жорий этилган эди.
Янги намунадаги миллий ҳайдовчилик гувоҳномалари ва автомототранспорт воситаси рўйхатдан ўтказилганлиги тўғрисидаги гувоҳномалар «Йўл ҳаракати тўғрисида»ги халқаро Вена конвенцияси ҳамда халқаро стандартлар тавсиялари асосида ишлаб чиқилган бўлиб, қурилмалар ўртасида маълумотларни бевосита алоқасиз амалга ошириш имконини берувчи махсус электрон белги (яъни NFC чип) га эга пластик карталар шаклида тайёрланади.
Амалдаги миллий ҳайдовчилик гувоҳномаларини янги намунадаги миллий ҳайдовчилик гувоҳномаларига алмаштириш жараёни 2017 йил 1 октябрдан бошланган бўлиб, 2020 йил 31 декабрда тугайди. Эски намунадаги миллий ҳайдовчилик гувоҳномалари 2021 йил 1 январдан бошлаб ҳақиқий эмас деб ҳисобланади.
Автомототранспорт воситаси рўйхатдан ўтказилганлиги тўғрисидаги гувоҳномани янги намунадаги гувоҳномага алмаштириш 2017—2020 йиллар мобайнида босқичма-босқич – автомототранспорт воситасини мажбурий техник кўрикдан ўтказишда амалга оширилади.
Янги намунадаги миллий ҳайдовчилик гувоҳномасининг амал қилиш муддати 10 йил.
Шуни алоҳида таъкидлаш лозимки, янги намунадаги миллий ҳайдовчилик гувоҳномасига эгасининг шахсини тасдиқловчи расмий давлат ҳужжати мақоми берилди. Бошқача қилиб айтганда, янги намунадаги миллий ҳайдовчилик гувоҳномаси Ўзбекистон Республикаси фуқаролик паспортига тенглаштирилди. Бу эса халқимиз турмуш даражаси ва сифатини оширишда кенг имкониятлар эшигини очади.
Эндиликда жойларда аҳолига давлат хизматлари кўрсатишни янада яхшилаш мақсадида янги намунадаги миллий ҳайдовчилик гувоҳномаларини нафақат Йўл ҳаракати хавфсизлиги бошқармаларининг рўйхатдан ўтказиш ва имтиҳон олиш бўлимлари орқали балки, Адлия вазирлиги ҳузуридаги давлат хизматлари марказлари орқали ҳам алмаштириб олиш имконияти яратилди.
Айни вақтда амалдаги ҳайдовчилик гувоҳномаларини ва автомототранспорт воситаси рўйхатдан ўтказилганлиги тўғрисидаги гувоҳномаларни янги намунадаги гувоҳномаларга алмаштириб олиш жараёни қулай, осон ва тез.
Қўшимча равишда шуни маълум қиламизки, 2021 йилнинг 1 январига қадар техник кўрикдан ўтказилганлиги тўғрисидаги талон, автомототранспорт воситасидан фойдаланиш ва (ёки) тасарруф этиш ҳуқуқи юзасидан ишончнома, транспорт воситаси эгасининг фуқаролик жавобгарлигини мажбурий суғурталаш полиси босқичма-босқич электрон шаклга ўтказилади, яъни улар NFC чипи ичига киритилади.
Ушбу ҳужжатларни қоғоз шаклида мажбурий расмийлаштириш тўғрисидаги талаб бекор қилинади.
Ўзбекистон Республикаси Ички ишлар вазирлиги Йўл ҳаракати хавфсизлиги бош бошқармаси.
Реклама ҳуқуқи асосида
