1-iyul kuni O‘zbekiston karlar jamiyatining Kar-soqovlar madaniyat markazida tantanali bayram tadbiri uyushtirildi. Bayram tadbirida bosh vazir o‘rinbosarlari Nodir Otajonov, Aziz Abduhakimov, Toshkent shahar hokimligi vakillari, madaniyat va san’at namoyandalari hamda OAV xodimlari ishtirok etdi.
Prezident Shavkat Mirziyoyev 29-iyun kuni Olmazor tumaniga tashrifi chog‘ida O‘zbekiston karlar jamiyatining Kar-soqovlar madaniyat markazini kelib ko‘rgan hamda jamiyat a’zolari bilan suhbatlashib, ularning dardu tashvishlarini, sohadagi kamchiliklarni so‘ragan edi.
Kar-soqovlar madaniyat markazi direktori Go‘zal Shodiyeva jamiyat a’zolarining madaniyat, san’at, sport va boshqa sohalarda erishayotgan yutuqlari haqida so‘zlab berdi. Uchrashuv qatnashchilarini tanishtirdi.
Davlat rahbari ularning yashash sharoitlari bilan qiziqdi. Shaxmat bo‘yicha ikki karra jahon chempioni Sirojiddin Zayniddinov, taekvondo bo‘yicha Osiyo chempionati sovrindori Davron Xidirov va raqs to‘garagi rahbari, xalqaro tanlovlar g‘olibi Oleg Oshepkovning uy-joyga ehtiyoji borligini eshitib, ularga Toshkent shahridan uy ajratishga topshiriq berdi. Kar-soqovlar madaniyat markazi a’zolarining ijodiy safarlariga qulaylik yaratish uchun markazga ikkita avtobus sovg‘a qilinishini aytdi.
Bugungi tantanali tadbirda karlar jamiyati a’zolariga Prezident sovg‘alari topshirildi.
Tantanali bayram dasturi, fayzli dasturxon atrofidagi suhbat jamiyat a’zolariga katta xursandchilik bag‘ishladi.
Izoh (0)