Фарғонада «Бургут» ҳарбий спорт мусобақаси ўтказилди

Фарғона шаҳрида жойлашган Темурбеклар мактаби ўқув-машғулот майдонида Ички ишлар вазирлигининг Фарғона, Андижон ва Наманганда жойлашган академик лицейлари жамоалари ўртасида «Бургут» ҳарбий спорт мусобақаси бўлиб ўтди. Бу ҳақда «Дарё» мухбири Азизжон Эрматов хабар бермоқда.

Ёшлар иттифоқи вилоят Кенгаши, вилоят ички ишлар, соғлиқни сақлаш, мудофаа, ўрта махсус касб-ҳунар таълими ҳамда жисмоний тарбия ва спорт бошқармалари ўртасида тузилган қўшма қарор ижроси доирасида уюштирилган ушбу мусобақада бўлажак осойишталик посбонлари ўз маҳоратларини синовдан ўтказди.

Бўлажак посбонлар «Моҳир мерган», «Тўсиқлардан ошиб югуриш», «Жабрланувчига биринчи тиббий ёрдам кўрсатиш», «Миналаштирилган ҳудудда ҳаракатланиш», «Сафда қўшиқ айтиш», «Maxфий пароллар билан ишлаш», «Ҳарбий унвонлар тури ва ҳарбий лавозимлар», «Ўзбекистон рамзлари», «Рақиб жамоа байроғини эгаллаш» каби шартлар бўйича ўзро куч синашдилар. Жамоларнинг хатти-ҳаракатларини нуфузли ҳакамлар ҳайъати баҳолаб борди.

Мусобақа якунига кўра, фарғоналик ёшлар биринчи, Наманган ва Андижон жамоалари эса иккинчи ва учинчи ўринларни эгаллади.