Россиялик офицер гранатани қўлидан тушириб юборган аскарни қутқариш вақтида ҳалок бўлди

Россиянинг Белгород вилоятида ҳарбий офицер жанговар ҳолатга келтирилган гранатани қўлидан тушириб юборган аскарни қутқариш вақтида ҳалок бўлди, деб хабар берди «РИА Новости».

Нохуш ҳодиса 20 март куни, тезкор хизмат аскарлари окопдан туриб жанговар гранаталарни отишни машқ қилаётган вақтида содир бўлган. Ҳарбий хизматчилардан бири гранатани тушириб юборган.

«Офицер гангиб қолган аскарни итариб юбориб, ўз танаси билан уни беркитган. Гранатанинг портлаши оқибатида офицер оғир тан жароҳатларини олган», — дейилади хабарда.

Аскарга эса ҳеч қандай шикаст етмаган. Шифокорларнинг саъй-ҳаракатига қарамай, офицерни қутқариб қолишнинг иложи бўлмаган. Қаҳрамонлик кўрсатган марҳум офицер давлат мукофотига тавсия қилинди.