Фотогалерея: Дунёдаги энг кучли жанговар кемалар

Бугунги кунда энг янги қуролларни ташувчи сувусти кемалари ривожланган флотларнинг асосий кучига айланди. «РИА Новости» дунё мамлакатларининг энг кучли ракета ташувчи кемаларидан иборат жамланмани тақдим этди.

Энг кучли қуролланган кемалар комплекси — «Тикондерога», АҚШ

«Тикондерога» кемалар комплекси АҚШ ҳарбий денгиз кучлари таркибида 1980 йилдан бери ҳаракат қилади ва унинг асосий зарба берувчиси ҳисобланади. Бу типда яратилган 27 та кемадан 22 таси ҳозирги пайтда ҳаракатда ҳисобланади. Экипаж таркибига 387 киши киради.

Ҳар бир кеманинг сув сиғими 9800 тоннани ташкил қилади ва жанговар ахборот бошқарув тизими билан жиҳозланган. Тизим асосий техник операцияларни кема бортида автоматлаштиришга имкон беради.

Асосий зарба берувчи куч турли ракеталар учун мўлжалланган 122 та универсал вертикал учириш қутилари ҳисобланади.

Энг катта — «Пётр Великий», Россия

Россиянинг оғир ядро ракеталар ташувчи «Пётр Великий» кемаси ҳозирги кунда, авиаташувчилардан истисно тарзида, дунёдаги энг катта жанговар кема ҳисобланади. Унинг тўлиқ сув сиғими 25,8 минг тоннани, узунлиги 250 метрни, максимал эни 28,5 метрни ташкил қилади. Экипаж аъзолари 760 кишидан иборат. Кема тиш-тирноғигача қуролланган ва ҳар қандай душманга қарши кураша оладиган сузувчи қалъа ҳисобланади.

Энг тезкор — «Атлант», Россия

Кўпчилик жанговар кемаларнинг тезлиги 55,56 км/соатдан ошмайди. Бу йўналишдаги рекордчилар 11380 тонна сув сиғимига эга Россиянинг «Атлант» кемалари ҳисобланади. Улар 64,82 км/соат тезликда ҳаракатлана олади. Россия денгиз флотида учта «Атлант» бўлиб, улар Қора денгиз флотидаги «Москва», Тинч океани флотидаги «Варяг» ва Шимолий флотдаги «Маршал Устинов» ҳисобланади.

Энг ҳимояланган — «Деринг», Буюк Британия

Буюк Британия флотидаги «Деринг»лар энг замонавий ва технологик кемалари ҳисобланади. Ҳар бирининг сув сиғими 8100 тоннани ташкил қилувчи мазкур олтита кема тактик зарба берувчи қуролларни олиб юрмайди. Уларнинг асосий вазифаси мамлакат ҳарбий денгиз кучларини ҳаводан келадиган хатарлардан ҳимоя қилиш ҳисобланади. Ҳар бир кема ҳаво ҳужумидан ҳимоя тизими билан жиҳозланган. Тизимнинг асоси С1850 радиолокация тизими бўлиб, 400 километр масофадаги ва яқин космосдаги нишонларни аниқлай олади ва бир вақтнинг ўзида 1000 та нишонни кузатиши мумкин.