2018 йил 1 март куни Unitel МЧЖ (Beeline) тармоғининг биллинг тизимида кўзда тутилмаган ҳодиса юз бериши сабабли, 2018 йил 1—2 март кунлари «Статус» ва «Бир Ой» тариф режаларидан фойдаланувчи абонентлар ҳисоб баланси ёки ишлатилган трафик нотўғри кўрсатилиши кузатилди. Бу ҳақда Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси расмий сайтида хабар берилди.
Натижада Unitel МЧЖнинг мижозларни қўллаб-қувватлаш марказига бўлган юклама кескин ошди, бу эса ўз навбатида Unitel МЧЖнинг мижозларни қўллаб-қувватлаш марказига қўнғироқни амалга ошириб бўлмаслик ва мазкур ҳодисадан бехабар бўлган абонентлардан кўплаб шикоятлар келиб тушишига сабаб бўлди.
Ушбу ҳодиса натижасида Unitel МЧЖ томонидан Ўзбекистон Республикасининг мобил алоқа хизматларини сифатли ва ўз вақтида тақдим этиш бўйича қонуний ва норматив ҳужжатлар талаблари ҳамда истеъмолчиларнинг ҳуқуқлари бузилган.
Юқорида келтирилганларни инобатга олиб, Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси келгусида мазкур ҳолатлар келиб чиқишининг олдини олиш ва ушбу ҳодиса бўйича абонентларни ўз вақтида огоҳлантириш юзасидан тегишли чораларни кўриш ҳамда Unitel МЧЖ тармоғида юз берган мазкур ҳодиса натижасида абонентларга етказилган моддий зарарни қоплаш бўйича Unitel МЧЖга кўрсатма берди ва кўрсатма бажарилишини назоратга олди.
Изоҳ (0)