Ўзбекистон Тожикистонда барпо этилаётган Роғун ГЭСи қурилишида иштирок этишга тайёр. Бу икки давлат раҳбари имзолаган Дўстлик ва аҳил қўшничиликни мустаҳкамлаш тўғрисидаги қўшма баёнотда ўз аксини топди.
«Томонлар сув ресурсларидан оқилона ва адолатли фойдаланиш соҳасида минтақавий шерикликни ривожлантиришдан ўзаро манфаатдор эканликларини билдирдилар ҳамда Марказий Осиё учун сув-энергетика муаммоларини ҳал этишда мавжуд ва барпо этилаётган гидроэнергетик иншоотлар муҳим аҳамиятга эга эканлигини таъкидладилар.
Шу муносабат билан Ўзбекистон томони Тожикистон Республикасида гидротехник иншоотлар, шу жумладан, Роғун гидроэлектр станциясининг қурилишида умумэътироф этилган халқаро нормалар ва мазкур объектларни қуриш бўйича стандартларга риоя қилинишини ҳисобга олган ҳолда иштирок этиш имкониятини ҳар томонлама кўриб чиқишга тайёр эканлигини билдирди», — дейилади ҳужжатда.
Томонлар Тошкентда Марказий Осиё халқаро экологик форуми (2018 йил, 5—8 июнь) ва Душанбеда «Сув барқарор ривожланиш учун» халқаро ҳаракатлар 10 йиллиги бўйича олий даражадаги халқаро конференция (2018 йил, 20—22 июнь) ўтказилишини мамнуният билан қайд этди.
Эслатиб ўтамиз, Италиянинг Salini Impregilo компанияси раҳбари Пиетро Салини Тожикистон раҳбари Эмомали Раҳмонга Роғун ГЭСининг биринчи агрегати 2018 йилнинг 16 ноябрь куни фойдаланишга топширилишини ваъда қилганди.
Изоҳ (0)