Россия Марказий сайлов комиссияси Жириновскийнинг дебатлардаги ҳақоратли сўзлари туфайли Бош прокуратурага мурожаат қилди

Россия Марказий сайлов комиссияси теледебатлар давомида президентлик лавозимига номзодлардан бирининг ҳақоратли сўзларига эътибор қаратди ва Бош прокуратурага хат йўллади. Бу ҳақда 10 март, шанба куни МСК раҳбари Элла Памфилова маълум қилди, деб ёзади «РИА Новости».

Аввалроқ «Россия 1» каналидаги дебатлар давомида Россия Федерацияси президентлигига номзод Ксения Собчак РЛДП етакчиси  Владимир Жириновский уни ҳақорат қилгандан сўнг сиёсатчига сув сепиб юборган эди.

Сиёсатчилар ўртасидаги можаро президентликка яна бир номзод Сергей Бабурин чиқиши давомида юз берди. Жириновский Бабуриннинг чиқиши учун ажратилган вақтга қўшилгандан сўнг, Собчак уни тинчланишга чақирди. Бунга жавобан РЛДП етакчиси уни «аҳмоқ» деб атади. Жириновский шундан кейин ҳам уни ҳақорат қилишда давом этди, шундан сўнг Собчак сиёсатчига стакандаги сувни сепиб юборди.

Памфилова номзодларни ҳеч ким хафа қилмаслигини кузатиб бориш МСК мажбуриятларига киришини таъкидлаб ўтди.