Наманган вилоят ИИБ томонидан халқаро хотин-қизлар куни муносабати билан ўтказилган байрам тадбирида ходима аёллар ва хизмат кўрсатган хотин-қизлар тақдирланди. Бу ҳақда «Дарё»га ИИБ матбуот хизмати маълум қилди.
Тадбирда Наманган транспорт ва ахборот технологиялари касб-ҳунар коллежининг 2-босқичида таҳсил олаётган Мадина Турдалиевага Ички ишлар вазирлигининг «Ёнғиндаги жасорати учун» кўкрак нишони топширилди. У ўтган йил ноябрида ёнғин содир бўлган хонадондан 70 ёшли кўзи ожиз Абдураҳмон ота Норқўзиевни қутқарганди.
— У киши бизнинг рўпарамиздаги хонадонда яшар эдилар. Ўша куни келинлари ва неваралари уйига кетиб, бир ўзлари қолган экан. Эҳтиётсизлик оқибатида ёнғин содир бўлиб, ёрдамга чақирганлар. Уйларига кирсам, ҳаммаёқ тутунга тўлиб кетган. Оловни ўчириб, у кишини олиб чиқиб, биринчи ёрдам кўрсатдик. Унгача бошқа хизматлар ҳам етиб келди, — дея ҳикоя қилади Мадина.
Коллежни тамомлаб, Ички ишлар академиясига киришни режа қилган қиз мукофот ва гулларни ИИБ бошлиғи полковник Одил Отахўжаевдан қабул қилиб олди.
Изоҳ (0)