1 март соат 18:00 да Аёллар тарихи ойлигини бошлаш ҳамда Халқаро хотин-қизлар кунини муносиб нишонлаш мақсадида АҚШнинг Ўзбекистондаги элчиси Памела Спратлен Тошкентдаги Next Mall кинотеатрида аёлларга бағишланган Америка фильм фестивалини очиб берди. Бу ҳақда «Дарё»га элчихона вакиллари маълум қилди.
Фильмлар фестивали 1 мартдан бошлаб Халқаро хотин-қизлар куни — 8 мартга қадар давом этади. 2–8 март кунлари соат 10:00 дан 22:00 гача кинотеатрда олтита хилма-хил фильм кўрсатилади. Фильмларда аёлларнинг жамият ривожига қўшган ҳиссаси кўпинча бееътибор қолдирилиши эътироф этилади. АҚШ элчихонаси фильмларни аслиятда, яъни инглиз тилида томошабинлар эътиборига ҳавола этади.
Америка фильмлари фестивали Қўшма Штатлар ва Ўзбекистон Республикаси ўртасидаги маданий алоқаларни кенгайтириш, шунингдек, инглиз тилини билиш даражасини оширишга қаратилган. Фильмларда бош ролни ижро этган аёллар илм-фан, математика, атроф-муҳитни муҳофаза қилиш, бизнес ва саноат, таълим ва спорт соҳаларида эришган ютуқлари билан ажралиб туради.
Фестиваль жамоатчилик, талабалар ва маҳаллий ташкилотлар вакиллари учун очиқдир. Барча фильмлар учун чипталар бепул. Бир киши бир кунда иккита бепул чипта олса бўлади.
Изоҳ (0)