Ўзбекистон—Тожикистон давлат чегараси орқали айрим ўтказиш пунктлари фаолиятини қайта тиклаш чора-тадбирлари тўғрисидаги ҳукумат қарори қабул қилинди. Бу ҳақда Адлия вазирлигининг Telegram’даги «Ҳуқуқий ахборот» каналида маълум қилинди.
Қарор билан Самарқанд вилоятидаги Жартепа, Жиззах вилоятидаги Кушкент, Учтурган, Сирдарё вилоятидаги Ховостобод, Тошкент вилоятидаги Бекобод, Наманган вилоятидаги Поп, Фарғона вилоятидаги Равот, Сурхондарё вилоятидаги Гулбаҳор автомобиль йўллари ўтказиш пунктлари ҳамда Амузанг темир йўл ўтказиш пунктининг муҳандислик-коммуникация ва йўлбўйи инфратузилмасини янада ривожлантириш назарда тутилмоқда.
Шунингдек, Самарқанд вилояти, Ургут туманидаги Жартепа аҳоли пункти ҳудудида чегара пости ташкил этилади.
Ўтказиш пунктларига туташ автомобиль йўллари бўйида замонавий стандартларга мос инфратузилмани ташкил этиш, шунингдек, фуқаролар учун зарур ижтимоий-маиший шароитлар яратиш белгиланмоқда.
«Ўзбекистон темир йўллари» акциядорлик жамиятига 2018 йил 1 мартгача Ўзбекистон ҳудуди доирасида Ғалаба — Хошадий темир йўл участкаси реконструкция қилинишини таъминлаш ва ўтказиш пунктида зарур хизмат-маиший шароитлар яратиш вазифаси топширилди.
Изоҳ (0)