Россия Испанияга 3 та, Нигерия Аргентинага 4 та гол урди. Бразилия Германия каби инглизлар постига йўл топа олмади

ФИФА кунлари доирасида ЖЧ—2018 учун тайёргарлик кўраётган терма жамоалар навбатдаги халқаро ўртоқлик ўйинларида майдонга тушди.

Жанубий Корея Сербия билан, Қатар Исландия билан дуранг ўйнади. Япония Бельгиядан енгилди

Россияга келиб, мундиал мезбонлари устидан зафар қучган Аргентина, бу сафар Нигериядан мағлуб бўлди. Сампаоли шогирдлари 2 та гол фарқи билан олдинга чиқиб олганди. Нигериянинг АПЛда тўп сурувчи футболчилари эса якунда жамоасининг иродали ғалабасини таъминлай олди.

Аргентина — Нигерия 2:4

Голлар: Эвер Банега, 26 (1:0). Серхио Агуэро, 36 (2:0). Келечи Ихеаначо, 45 (2:1). Алекс Ивоби, 52 (2:2). Бриан Идову, 55 (2:3). Алекс Ивоби, 74 (2:4).ЖЧ—2018 мезбони Россия эса Испания билан дуранг ўйнади 3:3. Саралашда Италияни қолдириб кетган испанлар сафида Серхио Рамос дублга эришди. Бунда «Реал» ҳимоячиси пенальтилардан унумли фойдаланди.

Видеотакрорлар кўрсатиб бердики, пенальтилар шубҳали эди. Бирида россиялик футболчи тўпни қўли билан эмас, елкаси билан ўйнагани маълум бўлди. Иккинчисида эса тўп жарима майдончаси ичига узатилганда, икки футболчи ўртасида кичик тўқнашув содир бўлгани кўринди.

Россия — Испания 3:3

Голлар: Хорди Альба, 9 (0:1). Серхио Рамос, 35-пен (0:2). Фёдор Смолов, 41 (1:2). Алексей Миранчук, 51 (2:2). Серхио Рамос, 54-пен (2:3). Фёдор Смолов, 70 (3:3).

Жаҳон Чемпионатидан четда қолган Голландия термаси ўзининг сўнгги икки ўртоқлик ўйинида зафар қучди. Бунгача голландлар саралашнинг сўнгги турида Швецияни 2:0 ҳисобида таслим қилиб ҳам, мақсадига ета олмаганди. Ўртоқлик ўйинларида эса Шотландия 1:0, Руминия 3:0 ҳисобида мағлубиятга учратилди.

Руминия — Голландия 0:3

Голлар: Мемфис Депай, 47 (0:1). Райан Бабель, 57 (0:2). Найжел де Йонг, 82 (0:3).

Коста-Рика термаси CONCACAF саралашини муваффақиятли якунлаганди. Бироқ америкалик футболчилар ЖЧ йўлланмасидан қуруқ қолган Венгриядан мағлубият қабул қилиб олди. ФИФА рейтингида 22-ўринни эгаллаб турган жамоа тўрт кун олдин Испаниядан қақшатқич зарба қабул қилиб олганди — 0:5.

Венгрия — Коста-Рика 1:0

Гол: Неманья Николич, 37 (1:0).

Уругвай термаси Австрияга имкониятни бой берди — 1:2. Жамоанинг кўҳна қитъага ташрифи муваффақиятсиз чиқди. Аввалроқ Уругвай Польша билан голсиз дуранг ўйнаганди — 0:0.

Австрия — Уругвай 2:1

Голлар: Марсель Забитцер, 6 (1:0). Эдинсон Кавани, 10 (1:1). Луис Шауб, 87 (2:1).

Германия ва Франция термалари ўртасидаги беллашув кечаги куннинг энг қизиқарли ўйини бўлди, дейиш мумкин. Бунда жаҳоннинг амалдаги чемпиони, Европа Чемпионатининг амалдаги финалчисига қарши ўйиннинг сўнгги сонияларида мағлубиятдан қутулиб қолди. Яқиндагина немислар Англия билан 0:0 ҳисобида дуранг ўйнаган бўлса, Франция Уэльсни таслим қилганди — 2:0.

Германия — Франция 2:2

Голлар: Александр Льяказетт, 34 (0:1). Тимо Вернер, 56 (1:1). Александр Льяказетт, 71 (1:2). Ларс Штиндл, 93+ (2:2).

АҚШни сенсацион равишда Россия мундиалидан четда қолдирган Панама тўрт кун аввал Эрондан мағлуб бўлганди — 1:2. Бу сафар улар Гарет Бэйл ватандошлари билан дуранг ўйнади — 1:1.

Уэльс — Панама 1:1

Голлар: Том Лоуренс, 75 (1:0). Армандо Купер, 93+ (П).Ноаниқ пенальти: Сэм Воукс, 42 (У).

Россиядаги Жаҳон Чемпионатига келмайдиган АҚШ эса Португалия билан дуранг қайд этди. Бунгача португалиялик футболчилар Саудия постига жавобсиз 3 та гол уришнинг уддасидан чиқа олганди.

Португалия — АҚШ 1:1

Голлар: Жон Маккейн, 21 (0:1). Виторино Антунес, 31 (1:1).

Ва ниҳоят кечаги куннинг энг шов-шувли ўйини ҳақида. Футбол ватани ва футбол афсунгарлари ватани ўртасидаги беллашувда мухлислар гол кўришмади. Инглизлар бунгача немислар билан ҳам «тешкулчалар»га рози бўлганди. Бразилия эса Японияни таслим қилганди — 3:1.

Англия — Бразилия 0:0