АҚШнинг Россиядаги дипломатик ваколатхоналари қўриқланишини Ташқи разведка хизматининг истеъфодаги раҳбарларидан бири Виктор Будановга тегишли компания таъминлайди. Бу ҳақда Forum Daily хабар бермоқда.
Elite Security Holdings АҚШ ҳукумати билан мамлакатнинг Россиядаги миссиясига (унинг таркибига Москвадаги элчихона, Санкт-Петербург, Екатеринбург ва Владивостокдаги консулхоналар киради) қўриқлаш хизматларини кўрсатиш учун 2,83 миллион долларга тенг йиллик шартнома имзолади.
Унинг вазифалари сирасига ваколатхоналарга рухсатсиз кирилишига йўл қўймаслик, ходимлар ва уларнинг оила аъзолари ҳаётини ҳимоя қилиш, тартибни сақлаш ва терактларнинг олдини олиш киради.
Холдингга 1997 йили истеъфодаги генерал-майор Виктор Буданов асос солган, ҳозирда ўғли Дмитрий томонидан бошқарилади.
Ташқи разведка хизмати расмий сайтида Виктор Буданов 1966 йилдан совет разведкасида ишлагани, хизматни 1992 йилда хизмат бошқармаларидан бирининг бошлиғи вазифасида якунлагани кўрсатиб ўтилган.
Россиядаги нашрлардан бирига берган интервьюсида Буданов 1987—1991 йилларда КГБнинг Шарқий Германиядаги миссиясида фаолият олиб боргани, унинг қўл остида Россиянинг бўлажак президенти Владимир Путин хизмат қилганини тасдиқлаганди.
Изоҳ (0)