Жасур Иброҳимов иши: Марҳум ҳамширага уни гуруҳ бўлиб дўппослашганини айтган

Миробод туман судида Жасурбек Иброҳимов иши юзасидан қўшимча гувоҳ сифатида марҳумнинг ётоғи олдида икки ҳафта навбатчилик қилган болалар шифохонаси ҳамшираси Малика Сиддиқова кўрсатма берди. Бу ҳақда «Новости Узбекистана» хабар қилди.

2-шаҳар болалар клиник шифохонаси реанимацион бўлими ҳамшираси ўсмирга 3–18 май кунлари қараганини маълум қилди.

Қизнинг сўзларига қараганда, бир куни кечки соатларда, Жасурбек иккинчи операцияни бошидан ўтказганидан сўнг улар орасида суҳбат бўлиб ўтган. Бу вақтда мижоз ва ҳамшира орасида илиқ муносабатлар ўрнатилган. Малика Жасур олдида кўп вақт ўтказган, боланинг аҳволи яхшилигида улар мулоқот қилган. Ўша тунда, соат 02.00 да ҳамшира 3 май куни нима бўлганини сўраган.

«Жасур жуда хафа эди ва у менга нима бўлганини айтиб берди. Унинг сўзларига қараганда, у ростанам Ислом билан 145-мактаб орқасида муштлашган. Муштлашувдан сўнг улар тарқалмоқчи бўлишган, аммо шу пайти кимдир уни орқасидан тепган, у тиззалаб қолган, кейин яна бир зарба еб, юзи билан йиқилган. Ҳар томондан зарба еб, ҳушини йўқотган», — ҳикоя қилиб берди ҳамшира.

Бу баёнотдан сўнг судья Матчонов қиздан у нега шифокорларга хабар қилмаганини ёки милицияга мурожаат қилмаганини сўради. Гувоҳ шифокорлар буни билганини тушунтирди. Бундан ташқари, бу ҳақда Жасурбек онасига ҳам айтиб берган эди. Шу билан бирга, Малика Сиддиқова Жасур унга ҳеч кимнинг исмини айтмаганини хабар қилди.

Йиғилиш чоғида, шунингдек, нега гувоҳ бу қадар муҳим маълумотни дастлабки кўрсатмаларида айтмагани сўралди.

«Дастлабки кўрсатмаларни берганимда мени шоштиришганди, баъзи жиҳатларни эътиборга олишмаганди. Терговчи мени барибир судга чақиришларини, қолганини йиғилиш чоғида айтишим мумкинлигини тушунтирди», — тушунтирди ҳамшира.

Судланувчининг адвокатлари нега ҳамшира бу ҳақда билиб, докторлар билмаганини сўради. Бунга жавобан қиз шифокорлар беморнинг қорнидаги пойабзал изини ва бўйнида бўғиш изларини пайқаганини айтди. Айнан шу туфайли улар бир неча суратлар туширган.

Маликага суд кўплаб саволлар берди. Масалан, нега суҳбат диктофонга ёзилмагани, нега ҳамкасбларига хабар қилмагани, терговчини чақирмагани сўралди. Аммо қиз Жасур тузала бошлаганини, шу боис барча унинг соғайиб кетишини кутганини айтди. Бу ҳақда марҳумнинг онаси ҳам бир неча бор айтган эди.

Бундан бир кун муқаддам суд бошқа қўшимча гувоҳлар — қурилишдаги уста ва Жасурнинг икки курсдошининг кўрсатмаларини эшитган эди.