Франциянинг Париж шаҳридаги бир хонали квартирасида 130 та мушукни сақлаган аёл ҳайвонларга нисбатан шафқатсиз муносабатда бўлганликда айбланди. Бу ҳақда The Local маълум қилди.
Аёлнинг қўшниларидан бири унинг мушук боласини дераза ойнасига улоқтирганини кўрган ва полиция чақирган. Полиция 60 ёшли аёлнинг уйига келганида 25 квадрат метрли уй мушуклар лиқ тўла эди. Уйнинг поли мушук ахлати билан қопланган, шифтда эса ёриқлар бор эди. Озғин мушуклар ёриқлар орқали чордоққа чиқиб кетарди.
Уйда жиддий жароҳатланган мушук боласи топилган. У ветеринария клиникасига олиб борилган, бироқ унинг аҳволи ёмонлашишда давом этган. Уч кундан кейин шифокорлар мушукча жароҳатдан тузала олмайди деган қарорга келган ва уни махсус йўл билан ўлдиришга қарор қилган.
Аёл ҳибсга олинган, бироқ кейин қўйиб юборилган ва текширув учун руҳий касалхонага юборилган. Мушукларга ёрдам бериш билан шуғулланувчи ташкилот ходимлари барча мушукларни ушлаб, уй ҳайвонларини сақлаш пунктларига олиб бориши учун тўрт кун керак бўлган.