Ўзбекистонлик таниқли тадбиркор Зафар Ҳошимов эълон қилинган конвертация механизми юзасидан илк хулосалари ва кузатишлари билан бўлишди.
У курснинг валюта биржасида банклар иштирокидаги кундалик савдолар асосида белгиланиши, Марказий банк ҳафтада бир марта солиқлар ва бошқа мажбурий тўловлар ҳисоб-китоби учун расмий курс белгилаши, жисмоний шахслар нақд долларларни айирбошлаш пунктларида нақд сўмга алмаштириб олиши мумкинлиги, шунингдек, долларни конверсион карталарга ҳам сотиб олиш мумкинлиги ва улар ёрдамида интернетда онлайн тарзда тўлаш мумкин бўлишини алоҳида қайд этиб ўтди.
Бундан ташқари, Зафар Ҳошимов уяли алоқа операторлари, провайдерлар тўловлари сўмга ўтказилиб, 4 сентябрдаги курс бўйича белгилаб қўйилганини таъкидлади. Шу билан бирга, мамлакат ҳудудидаги халқаро ОТМларда шартнома тўловлари борасида ҳозирча ноаниқлик борлигини айтиб ўтди.
Импорт маҳсулотлар нархлари ошиб кетишига йўл қўймаслик учун божхона божлари ва тўловлари ҳафта ичида қайтадан кўриб чиқилади, дейилади постда. Тадбиркор юридик шахслар ўз банкларидан жорий нархларда валюта сотиб олаётганини ҳам қайд этди.
«Кўплар сотиб олинаётган валютанинг карталарга ўтказилиши қора бозор бизнесини сақлаб қолади, деб айта бошлади. Мен бунга қўшилмайман. Агар банклар нақд валютани бозор нархига яқин курсда сотиб олса, ким нақд долларни банкка эмас, қора бозорга топшириш рискига боради?» — деб ёзди у.
«Тан олинг, давлат аҳолини девальвациянинг салбий оқибатларидан ҳимоя қилиш учун имкони борича ҳаракат қилди. Мен бундан-да инсонийроқ қиёфали девальвацияни ҳеч қаерда кўрмаганман», — дея хулоса қилди «Korzinka.uz» тармоғи раҳбари.
Изоҳ (0)