Россиянинг оғир автомобиль техникасини ишлаб чиқарувчи йирик «КАМАЗ» компанияси Тошкентда янги дилерлик ва хизмат кўрсатиш марказини очди, деб хабар берди «Новости Узбекистана».
4 сентябрь куни Тошкентда автомобиль техникасини, уларга асл техник қисмларни сотиш ва автоуловларга техник хизмат кўрсатиш бўйича янги «КАМАЗ» дилерлик ва хизмат кўрсатиш марказининг очилиши бўлиб ўтди.
Қайта очилган марказни яратиш бўйича келишувларга Ўзбекистон Президенти Шавкат Мирзиёевнинг Москвага олий даражадаги ташрифи чоғида ўтказилган музокаралар давомида эришилган.
«КАМАЗ» бренди — Россиядаги йирик автомобиль корпорацияси ҳисобланиб, нафақат МДҲ давлатларида, балки дунёнинг кўплаб бурчакларида ҳам машҳур. Корпорациянинг Россия автомобиль бозоридаги улуши 50 фоиздан ортиқ.
«Пойтахтимизда янги хизмат кўрсатиш ва дилерлик марказининг ишга туширилиши Россия ва Ўзбекистон ўртасида жадал ривожланиб бораётган муносабатларнинг яна бир тасдиғи бўлиб, ‘КАМАЗ’ автомобилларига сифатли ва самарали хизмат кўрсатиш ва асл эҳтиёт қисмларни сотиш учун янги имкониятларни очади, шунингдек, минтақанинг иқтисодиётига ижобий ҳисса қўшиб, янги иш ўринларини яратади», — деди дилерлик ва хизмат кўрсатиш маркази лойиҳасининг директори Жавлон Ҳалилов.
Ҳозирча марказ таъмирлаш учун бир вақтнинг ўзида олтита автомобилни қабул қила олади. Яқин келажакда Тошкентда майдони 2 гектарга тенг бўлган яна бир хизмат кўрсатиш марказини очиш режалаштирилмоқда.
Изоҳ (0)