Хакерлар гуруҳи АҚШнинг HBO кабель каналига ўғирланган ҳужжатларни ошкор этиш билан таҳдид қилиб, товон пули сўради. Ошкор этилиши айтилаётган ҳужжатлар орасида ҳали эфирга узатилмаган дастурларнинг сценарийлари бор, деб хабар беради Meduza.
Видео шаклида тайёрланган талабнома ярим гигабайт ҳажмли архив билан бирга интернетга жойлаштирилди. Хакерларнинг таъкидлашича, ўғирланган ҳужжатларнинг умумий ҳажми бир ярим терабайтга тенг. Интернетга жойлаштирилган архив ичида «Тахтлар ўйини» сериали еттинчи мавсумининг дастлабки беш қисми сценарийси, шунингдек, HBO’нинг кинодастурлаш бўйича вице-президенти Лесли Коэннинг ёзишмалари, шунингдек, бир қанча бошқа шоуларнинг сценарийлари ҳамда хизмат ҳужжатлари мавжуд.
Ҳужжатлардан бирида «Тахтлар ўйини» юлдузларининг шахсий маълумотлари, шу жумладан, актёрлар Питер Динклейж, Лина Хиди ва Эмилия Кларкнинг телефон рақамлари бор.
HBO бош директори Ричард Плеплерга йўлланган видеомурожаатда «мистер Смит» сифатида имзо қолдирган хакерлар олти ойлик меҳнатлари учун маош талаб қилган — телеканал компьютерларини бузишга айнан шунча вақт кетган. AP’га кўра, улар биткоинларда 6 миллион доллар тўлашни талаб қилмоқда.
HBO вакилларига жавоб учун уч кун вақт берилди.