Шавкат Мирзиёев «Темурбеклар мактаби»ни ташкил этиш бўйича таклифлар билан танишди

Ўзбекистон Президенти Шавкат Мирзиёевнинг Юнусобод компьютер технологиялари касб-ҳунар коллежига ташрифи давомида бир қатор лойиҳалар бўйича ахборот берилди.

Хусусан, ЎзА ахборотига кўра, Президентга Мудофаа вазирлиги ҳузурида «Темурбеклар мактаби»ни ташкил этиш бўйича ишлаб чиқилган таклифлар ҳақида ҳам маълумот берилди.

Агентлик хабарида «Темурбеклар мактаби» бўйича берилган таклифлар ҳақида батафсил ахборот берилмаган.

Қайд этиш жоиз, Шавкат Мирзиёев Ўзбекистонда ёшларга ҳарбий таълим-тарбия берадиган курсантлар мактабларига «Темурбеклар мактаби» номини бериш ҳақидаги таклифни 30 июнь куни бўлиб Ўзбекистон ёшлари қурултойида илгари сурган эди.

Президент томонидан 5 июль куни имзоланган «Ёшларга оид давлат сиёсати самарадорлигини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида»ги фармонда мамлакатнинг барча ҳарбий академик лицейларига «Темурбеклар мактаби» номи берилиши белгилаб қўйилган эди.

Мазкур қарор «буюк давлат арбоби ва саркарда Амир Темурнинг Ватанга садоқат, эл-юртни ардоқлаш, мардлик, фидойилик ва адолатпарварлик каби юксак фазилатлари ёш авлод учун ўрнак бўлиб хизмат қилишини инобатга олган ҳолда» қабул қилинган.