O‘zbekiston Prezidenti Shavkat Mirziyoyevning Yunusobod kompyuter texnologiyalari kasb-hunar kollejiga tashrifi davomida bir qator loyihalar bo‘yicha axborot berildi.
Xususan, O‘zA axborotiga ko‘ra, Prezidentga Mudofaa vazirligi huzurida “Temurbeklar maktabi”ni tashkil etish bo‘yicha ishlab chiqilgan takliflar haqida ham ma’lumot berildi.
Agentlik xabarida “Temurbeklar maktabi” bo‘yicha berilgan takliflar haqida batafsil axborot berilmagan.
Qayd etish joiz, Shavkat Mirziyoyev O‘zbekistonda yoshlarga harbiy ta’lim-tarbiya beradigan kursantlar maktablariga “Temurbeklar maktabi” nomini berish haqidagi taklifni 30-iyun kuni bo‘lib O‘zbekiston yoshlari qurultoyida ilgari surgan edi.
Prezident tomonidan 5-iyul kuni imzolangan “Yoshlarga oid davlat siyosati samaradorligini oshirish va O‘zbekiston yoshlar ittifoqi faoliyatini qo‘llab-quvvatlash to‘g‘risida”gi farmonda mamlakatning barcha harbiy akademik litseylariga “Temurbeklar maktabi” nomi berilishi belgilab qo‘yilgan edi.
Mazkur qaror “buyuk davlat arbobi va sarkarda Amir Temurning Vatanga sadoqat, el-yurtni ardoqlash, mardlik, fidoyilik va adolatparvarlik kabi yuksak fazilatlari yosh avlod uchun o‘rnak bo‘lib xizmat qilishini inobatga olgan holda” qabul qilingan.
Izoh (0)