Таиланддага уйга номаълум шахслар томонидан уюштирилган ҳужум оқибатида саккиз киши, жумладан, бир нафар чақалоқ ҳалок бўлди, яна уч киши жароҳат олди, деб хабар берди «Вести.ru».
Нохуш ҳодиса 10 июль кечаси мамлакат жанубидаги Краби провинциясида содир бўлган. Жиноятчилар уйга бостириб кирган ва у ерда истиқомат қиладиганларни асирга олган, шундан сўнг уларни отиб ташлаган, деб хабар берди Reuters.
Полициянинг фикрича, оммавий қотилликка шахсий келишмовчилик сабаб бўлган. Ҳужумда беш ёки олти киши иштирок этган. Жиноятчиларни қидириш ишлари давом этмоқда.
Таиландда ўқотар қуроллардан фойдаланишга рухсат берилган ва кўплаб аҳоли ўзини ҳимоя қилиш мақсадида уни ёнида кўтариб юришига қарамай, мамлакатда бу каби оммавий қотиллик жуда кам учраб туради. Статистик маълумотларга кўра, мамлакатнинг 67 миллион аҳолиси ҳисобига 6,1 миллион расман рўйхатга олинган ўқотар қуроллар тўғри келади.
Изоҳ (0)