Бекобод туманида яшовчи Мастура Шаҳобиддинова Бекобод тумани «Янги ҳаёт» фермерлар уюшмасида яшовчи 1994 йилда туғилган Нилуфар Бахтиёрованинг ишончига кириб, 2017 йил 9 февраль тахминан соат 17:00 да у ишлайдиган Бекобод тумани Зафар шаҳарчасида жойлашган «Зумрад» номли гўзаллик салонига келган ва Нилуфарга тегишли бўлган 16 грамм тилла тақинчоқларини 3—4 кун ичида сотиб беришни ваъда қилган. Мастура Шаҳобиддинова тақинчоқларнинг ҳар бир граммини 180 минг сўмдан жами 2 млн 880 минг сўмга сотиб беришни олдиндан ваъда қилиб, ушбу тилла тақинчоқларни фирибгарлик йўли билан қўлга киритган ва тилла тақинчоқларни сотиш эвазига келган пулларни ўзининг эҳтиёжлари учун ишлатиб юборган. Бу ҳақда Тошкент вилояти ИИБ хабар берди.
Бундан ташқари, фуқароларнинг пул маблағлари бўлган пластик карталарини нақд қилиб беришни олдиндан ваъда қилган ва бунинг эвазига 10 фоизини ўзига олиб қолишни айтган. Шу тариқа, 1964 йилда туғилган Баҳодир Олтмишовнинг ҳисобида 3 млн 770 минг сўм, 1985 йилда туғилган Шодмон Шодиевнинг ҳисобида 6 млн 700 минг сўм, 1949 йилда туғилган Шерали Қориевнинг ҳисобида етти миллион сўм миқдоридаги пул маблағлари бўлган пластик карталарини фирибгарлик йўли билан қўлга киритиб, пластик карталарнинг ҳисобида бўлган пул маблағларини ўзининг эҳтиёжлари учун ишлатиб юборган.
Шундай қилиб, фуқаро Мастура Шаҳобиддинова жами 20 млн 350 минг сўм миқдордаги пулларни алдаш, ўзгаларнинг ишончни суиистеъмол қилиш йўли билан ўзлаштиришга эришган.
Олиб борилган тезкор чора-тадбирлар натижасида бу фирибгарликларга чек қўйилди. Эндиликда Мастура Шаҳобиддинова содир этган хатти-ҳаракатлари учун қонун олдида жавоб беради.
